Police-in Bethlehem lakah phuba an la thei ang em?

MPL leh I Day Football champion lai Mizoram Police an mualpho a, LZ Juice MPL11 phase 1 kharna inkhelah FC Bethlehem lakah 5-2 in an chak lo. Vawiin chhun dar 12:00 hian Police-in Bethlehem hi an hmachhawn lehnghal dawn a, Lalbiaksanga Colney hote hian MPL kai thar hi football zirtir let an tum ang.

Police nge nge

Mizoram Police hi MPL ṭan hmaa tualchhung football-a team ṭha bera chhal ngam an ni a, MPL1 ṭan hma chiaha neih I Day Football-ah pawh an champion. Mahse, Police hian MPL-ah nomawi an chawi thei lawk lo.

Hei chauh hi a ni lo, tun hma aṭanga Mizoram football thunun theitu ni siin Police hian All India Police Meet-ah pawh football-ah an la champion ngai lo. Police player-te an upa hret hreta ngaih a ni a, an hun a ralah ngaih a ni hman.

Mahse, Lalbiaksanga Colney kaihhruai Police team chu March 2023 khan 1st B.N. Mullik Memorial All India Police Football Championship-ah an champion a, mellung thar an phum.

2022-23 season hian Police hian I Day Football nomawi an chawi bawk a, MPL-ah erawh Sikkim-a inelna an hmachhawn avangin semifinal an thleng zo lo. MPL10-ah Police hun a rawn inher chhuak a, a vawi khat nan MPL-ah an champion leh bawk.

MPL11-ah Police-in bul ṭan ṭha lo mah se I Day Football nomawi an chawi leh tho a, champion turin team ṭha Chanmari FC leh Aizawl FC an hneh avangin an champion dan a hlu bik.

An tlu sawp

I Day Football a zo a, Police-in MPL nomawi humhim ngei an tum tih lantirin Sihphir Venghlun 6-0 in an sawp nghal. BS-a Colney hote a sang pali zingah an invawrh chho a, record an neih ṭhat bawk avangin team tum châk awm lo ber zinga mi an ni leh tawh.

Football-ah thilmak a thleng fo a, Police pawhin an pumpelh bik lo. MPL11-a chak hmel pawh la hmu lo, FC Bethlehemin I Day Football nomawi chawi hlim leh MPL champion lai Police hi 5-2 in an sawp a, 5-0 a hma an hruai hman hial avangin MPL kai thar hian Police hi football an zirtir a ni ber a, an tlusawp.

Police hian Bethlehem hi an zuam sual a ni ber a; goal venhim dan an theihnghilh bakah an goal bawh a na lo. FCB player-te erawhin an hna an hrechiang a, an phu ang ngeiin hnehna an chang.

Ni thum hnuah

Police thinur a la reh lo a, player chauh ni loin coaching staff leh club hotute thlengin hrehawm an ti. MPL champion lai hian tlawm nawn an duh lo a, ni thum hnuah phuba lakna remchang an nei lehnghal.

BS-a Colney hote hi Aizawl FC lakah an mualpho a, I Day Football final-ah phuba an la. I League club laka phuba an lak zawh hnuah Bethlehem lakah an mualpho leh a, phuba lak an tum leh dawn. Police thinur hmachhawn hi FCB tan a harsa ang.

Chutihrualin Bethlehem hi season ṭantirh ang kha an ni tawh lo a, an khelh danah hma an sawn bakah player thar an la lut. Police an sawp ṭum hian player thar Lalnunzira Sailo-in goal hnih a khung nghal a, tlarhnungah defender thar Daniel Lalliana a khel ṭha takzet bawk.

Coach Lalhriatpuia Sailo leh a puitu Lalthantluanga (T2-a) ten an hna an thawk ṭha a, Project Veng FC aṭanga an lakluh Lalfamkima pawh a hmang ṭha ta hle. Bethlehem hian Police hi an hneh nawn a nih ngat chuan vanneih vang a ni lo tih a hriat theih ang a, table mawngphaha awm ni mah se semifinal khelh beiseina an nei nghal bawk ang.