Alcaraz leh Sinner ten fiahna paltlang

US Open champion tum pahnih Carlos Alcaraz leh Jannik Sinner te chuan an match hmasa berah fiahna an hmachhawn nghal a, set hloh ve ve mah se an khingpui an paltlang thung.

World number 1 Sinner chian set hmasa ber a hloh nghal a, mahse tualchhung tlangval Mackenzie McDonald chu 2-6, 6-2, 6-1, 6-2 a hneh letin New York khawpuiah second round a inhlangkai.

French Open leh Wimbledon title kawl mektu Alcaraz tan pawh kawng a awlsam bik lo - Spanish star hian qualifying paltlanga inlan Li Tu chu 6-2, 4-6, 6-3, 6-1 a hnehin first round a paltlang ve bawk.

Inkhel dangah Stefanos Tsitsipas chu a chak lo nghal a, hetihlai hian 2021 champion leh season hmasa finalist ni bawk Daniil Medvedev erawhin Dusan Lajovic hnehin New York khawpuiah a match 30 nan hnehna a chang.

Sinner leh Alcaraz

Tun hnai khan Sinner hian tennis court pawn lamah buaina a nei, damdawi hman phal loh chungchangah buaina neiin, test pawh a paltlang zo lo - mahse thiam lohna a nei lo nia puan a ni thung.

Buaina a neih hnua a match hmasa ber a ni. Arthur Ashe Stadium-ah mipui ṭan a hlawh a, set hmasa berah talbuai duh mah se Australian Open champion hian a khelh dan pangngai a nei let thuai a, a buai chhunzawm lem lo.

Italian tlangval Sinner chuan, "Harsatna ka tawk ngei mai a, chutiang karah chuan min thlawp tlattu mi tam tak an awm. Training lai aṭangin min thlawp a, inkhelhna takah pawh ka chakna hnarte an ni," tiin fans chungah a lawm hle.

Alcaraz pawhin boruak ṭha a nei, tournament hnuhnung berah beisei phak loin a thinrim a insum zo lo bawk a, tunah erawh a ze pangngai a chhuah leh dawn ta niin a lang, buaina neiin a lang tawh lo.

Grand Slam vawi li champion tawh Alcaraz hian kuminah French Open leh Wimbledon title a la tawh, tun ṭumah hian a champion leh thei a nih chuan Rod Laver leh Rafael Nadal te hnung zuia season khat chhunga hetiang nomawi lian pathum la leh thei hmasa a ni ang.

Alcaraz leh Sinner te hi champion lai Novak Djokovic el phak leh chhaih buai thei ber tura ngaih an ni a, an kaltluang zel a nih chuan semifinal-ah an inhmachhawn thei dawn, pakhat zawkin Djokovic a tum thei dawn tihna a ni.

Tsitsipas a tla

Player ṭha tak a ni a, inelna lian dangah pawh a hlauhawm ṭhin. Mahse, Tsitsipas tan US Open hi chu hmun ṭha a ni mawlh lo, season kua ngawt chu round hmasa lamah a tla ziah, kuminah pawh a ze ngai a la kalsan thei lo.

Greek tlangval hi tun ṭumah hian seeded 11-na a ni phak, amaherawhchu world number 86 Thanasi Kokkinakis lakah 7-6 (7-5), 4-6, 6-3, 7-5 in a chak lo nghal, tun hnai season thum chhung chu hneh nei loin a tla.

New York khawpuiah hian third round a la kalpel ngai lo a, kuminah pawh ranking sang zinga tla hmasa ber a ni leh ta a ni. French Open 2021 leh Australian Open 2023 te kha chuan final a lut phak thung si a ni.

Tsitsipas hian US Open inbuatsaihna Cincinnati Open-ah khan beisei a phak lo a, inelna lian hmachhawn hma hian a coach leh pa ni bawk Apostolos nen an thawhdunna pawh an titawp, result ṭha erawh a kengtel rih chuang lo.

Inkhel dangah Canadian tlangval, seeded 19-na Felix Auger-Aliassime pawh a chak lo, a khingpui rawlthar Jakub Mensik chu 6-2, 6-4, 6-2 in a ngam lo. Seeded pasarihna Hubert Hurkacz erawhin Timofey Skatov chu 6-3, 7-6 (7-4), 7-6 (7-3) in a hneh.

Kum 39 mi Stan Wawrinka erawh a chak lo - Swiss star hi duhsak takin wildcard pek ni mah se, a match hmasa berah 6-4, 7-6 (7-5), 6-3 in Italian mi Mattia Bellucci lakah a tlawm, seeded 10-na Alex de Minaur chuan Marcos Giron a hneh thung.