Arsenal midfielder thar Mikel Merino

Mikel Arteta enkawl Arsenal chuan Premier League champion tumin squad an thuam chhah zel - Spain midfielder Mikel Merino chu Real Sociedad aṭangin an la lut a, a man zat hi pound maktaduai 31.6 thlenga sang chho thei tur a ni.

Kum 28 mi Merino hian Emirates Stadium-ah season li daih contract a ziak a, hei bakah hian kum khat dang pawhsei leh theih tura tih a ni bawk - a tirah chuan a man hi £27.4mtd an pe phawt ang, a pun belh theihna hi £4.2mtd a ni thung.

Gunners manager Arteta chuan, "Mikel hian tawnhriat a nei ṭha tawh, a themthiamin a fing em em bawk. A theihna sang tak hmangin kan squad hi min ti chak zual ngei ang.

"Euro 2024 khelh zawh takah pawh khan eng ang player nge a nih chu kan hre chiang hle. Mikel hi hnehna chan duh, theihtawpa bei mi a ni a, Spain chu hlawhtlinna a chanpui bawk," tiin a player thar lakah beisei a nei sang hle.

Merino hi deep-lying midfielder atana hman ṭhin a ni a, a khelh dan pangngai anga hman a nih chuan Declan Rice nen an inel dawn, season hmasa kha chuan Rice hi 'box-to-box' atan hman a ni.

Rice bakah hian Jorginho, Thomas Partey leh Martin Odegaard te an la awm bawk a, coach Arteta tan midfielder thlan tur an chhah ṭha dawn tihna a ni a, chutihrualin an khelh dan a siksawi hret a nih pawhin a mak lo ang.

Tun hmain Merino hian Premier League-ah tawnhriat a nei tawh, season khat chhung chu Newcastle Unted tan a lo khel tawh; EPL match 17 aṭangin goal khat a khungsak.

Spain tana match 28 khel tawhtu hian season hmasa kha a hmang ṭha hle. La Liga club Real Sociedad tan inelna hrang hrangah match 45 a khel a, goal riat a khungsak bawk a ni.

Arsenal sporting director Edu chuan, "Mikel hi tun nipui bazar chhunga kan player duh leh hel reng a ni a, team tichak thei tur tak niin club dang pawhin an hel vel kara kan chang thei hi a lawmawm.

"Squad thuam chhah kan ngaipawimawh a, season hmasa aia hmansawn ngei pawh kan tum," a ti. Season hnuhnung pahnihah EPL-ah pahnihna an ni, an chunga awm Manchester City tlan pelh an tum dawn a ni.

Arsenal hian Premier League season bul an ṭan fuh, match hmasa pahnihah Wolves leh Aston Villa te chu goal hnih fai ve vein an hneh - tun kartawp Inrinni tlai hian Brighton an mikhual zui leh ang.