Chawnpuiin Rindika Hmar an lalet

LZ Juice MPL11-ah Chawnpui FC-in phase 1-ah point nga chauh an hmuh avangin relegate thei dinhmunah an ding. MPL9 champion-in Mizoram inelna sang ber khelh zel an duh a, beiseina sang tak nen season liam taa semifinal thlengpuitu Lalrindika Hmar an la lut.

Rindika Hmar hian an veng club FC Venghnuai chu division hnuai aṭangin MPL thleng a thlenpui bakah final hial a thlenpui a, season liam ta khan Chawnpui FC enkawlin round 7 zawhah point 15 a hmuhpui a, round 14 zawhah point 23 hmuin semifinal an lut.

Chawnpui hian match sarih aṭangin point nga chauh an la hmu a, chutihrualin point 21 hmuh theih a la awm avangin semifinal kawng thlengin a la inhawng. Chutihrualin Chawnpui hian an player ṭha ṭhahnem tak an chân a, Rindika Hmar tan pawh hmabak a harsa ang.

Chawnpui hian August 30, Zirtawpni chhun dar 12:00-ah Sihphir Venghlun FC an hmachhawn ang a, Rindika Hmar hoin an khel ṭan ang.