Sangliana cho tur an zawng dawn!

Inter District Wrestling Championship vawi sarihna rualin Mizoram Inchai Title Fight-a inlan tur zawn a ni nghal dawn a, palian champion lai Lalsangliana title chuh tumin mi pali an inlan dawn.

Nimin khan Inter District Wrestling Championship hi LPS Arena, Falkland Vengah neih ṭan a ni a, ruahman dan chuan tun kar tawpah a zo ang. District hrang hrang pasarih an inelna dawn a, greco-roman leh freestyle inchaia tel turin wrestler 148 an inbuk. A hawnna aṭanga a kharna thlengin inchai zawng zawng LPS 10-ah live-in pek chhuah tur a ni.

District hrang zingah championship thlengtu Aizawlin wrestler ngah ber in mi 58 an tel a, Saitual (23), Kolasib leh Serchhip (20), Mamit (16), Lunglei pakua leh Champhaiin pahnih an thawh chhuak bawk.

Anni ho bakah hian Mizo inchai champion lai cho thei tur zawn nghal a ni dawn a. Palian champion Lalsangliana'n kum 10 chuang champion kawnghren a hreng tawh. Kum 2014 khan Lalnunfela kut aṭangin title a chhuhsak a, kum 2022 November khan Fela'n hneh let tumin bei mah se 20-0-in a chak a, a inchai hnuhnun ber a ni nghal.

Tun ṭumah hian champion hlui Fela a tel dawn loh avangin, kum 33 mi Sangliana dinhmun luahlan tumin mi thar an rawn chhuak dawn. North Vanlaiphai inchai chak Lalrinchhana Sailo bakah Zobawk, Lunglei aṭangin Lalremtluanga, Rehoboth Laldinthara (Zokhawthar) leh Serchhip tlangval Raymond Lalthansanga te an inel dawn a, an zinga chak ber hi a vawi khat nan Mizo Palian Inchai title fight-ah inlanin Upper Republic chhuanvawr Sangliana an hmachhawn ang.

Paihawl Champion lai Remruatpuia (Saitual) chai tumin, amah ang bawka Saitual wrestler Ngursangzuala, Vanlaldingngheta (Khatla) leh Vanlallawma (Muallungthu) an inel ve thung dawn a ni.

Saitual wrestler Lalawmpuia'n Patê title kawl mekin, Kolasib inchai chak pathum Lalhruaitluanga, John Lalremmawia leh Lalnunpuia bakah, Lalchhanhima (Saitual), Jacob Vanlalrinliana (Venghlui), Nazareth Lalṭhazuala (Zemabawk), Lalhmangaihzuala (Republic Veng) leh Lalawmpuia (Bulfekzawk) an inel dawn.

Hmeichhe lamah nulian champion Hmangaihsangi cho tur zawnnaah Zodinpuii (Lunglei) leh Lalsiamthari (East Lungdar) an inziak lut a. Nulaihawl champion Elizabeth Rohlupuii chai tumin Pentecost Lawmsangpuii (Champhai) a inbuatsaih bakah Nutê champion Lalvenhimi chaitu nih tumin Veronica Lalbeiseii (Tachhip) leh Laltluangpuii (Kolasib) an inchai ang.