Liverpool keeper thar Mamardashvili

Nipui transfer-a player lakluh la nei lo Liverpool chuan player an la lut ve dawn ta a, mahse, loan-in a chhuak lehnghal dawn - Reds hian Georgia goalkeeper Giorgi Mamardashvili chu Valencia aṭanga la lut turin Spanish club hi inremna an neihpui.

Club pahnih inremna ang chuan Liverpool hian pound maktaduai 25 an pe phawt ang a, a khelh ṭhat dan a zirin £4mtd an pek belh ang. Mahse, season thar chu kum 23 mi keeper hian a club Valencia-ah hian loan-in a la khel leh phawt dawn a ni.

Liverpool hian khawvela goalkeeper ṭha ber pawl Alisson Becker an kawl mek a, Brazilian keeper hian Anfield-ah kum hnih cham turin contract a la nei - kum khat dang pawhsei theihna dan a awm tel bawk.

Mamardashvili an lakluh takah chuan Alisson dinhmun hi a derthawng dawn em ni, tih chu tam tak zawhna a ni a, mahse, Brazil international hian Georgian keeper lakluh hi a thlawp thlap thu a lo sawi tawh.

Saudi Arabia aṭanga sawmna hmutu Alisson chuan, "Ka contract hman zawh emaw, a thar ziah emaw ka duh a, Anfield-ah hian kei leh ka chhungte kan hlim a ni. Mamardashvili lakluh an tum thu hi a hma daihin ka lo hre tawh a, club-in ka ngaihdan an la thlap hian min ngaihtuahzia a pholang a ni.

"Mamardashvili kan nei tur hi ka lawm a, mahse, ka chhuah phah lo ang. He hmunah hian contract ka neih a, kei leh club kan hlim chhung chuan Anfield-ah ka cham reng dawn," a ti a, chhuah a tum lo hle.

Alisson hi Liverpool number 1 a nih chhunzawm dawn a, a thachhawng dawl turin Republic of Ireland keeper Caoimhin Kelleher a awm bawk - tlarhnung lam chu Reds hi an intodelh dawn hle.

Georgia tana vawi 21 inlan tawh Giorgi Mamardashvili hi Euro 2024-ah pawh khan ram tana feh chhuakin, match li an khelhah a inlan vek. An ram club Dinamo Tbilisi aṭanga a professional zinkawng zawh ṭanin, Rustavi leh Locomotive Tbilisi tan pawh a lo khel tawh a, kum 2021 khan Valencia hi panin, match 102 a khelhsak tawh.