Man United midfield tichaktu tur Ugarte

Manchester United chuan midfield tih chak nan PSG aṭangin Manuel Ugarte chu €50mtd-in an lalut a, a chet ṭhat dan a zirin a man hi €10mtd-in a pung thei ang. Uruguayan midfielder hian kum nga daih contract a ziak.

Kum 23 mi Ugarte hian Thawhṭanni zan khan Manchester a thleng a, nimin khan medical test a nei nghal. Nipui bazar inhawn ṭantirh aṭangin Ugarte hi Man United nen sawi zawm a ni tawh a, transfer tawp hnai tawhah a thleng dik.

Ugarte hi Uruguayan club Fénix aṭanga inzir chhuak niin Sporting CP-ah a hming a chher a, PSG-in nikum nipui bazar mai khan €60m-in an lalut.

Season liam ta khan Luis Enrique hnuaiah Ugarte hian league match 25 a khel a, Ligue 1 nomawi a chawipui. Ugarte hian September 5, 2021 aṭangin ram tan a khel ṭan a, ram tan vawi 22 khel tawhin kumina neih Copa America-ah khan Uruguay pathumna a nihpui bakah team of the tournament-ah a tel.

Ugarte hi defensive mifielder a ni a, khingpuite ball chhuhsak thiam niin league match 25 chauh khel mah se Ligue 1-a tackle hnem ber (98) a ni.

Man United hi Chelsea duh loh Raheem Sterling nen pawh sawizawm an ni a, club pahnihin indawrna nei tawhin he thu ziah lai chuan inremna a la awm lo.