Aston Villa an la chak vek

Premier League season kal laia match an khelh tawh china chak vek thei chu Aston Villa chauh an ni! Dean Smith-a naute hian league match li an khelh aṭangin point 12 an hmu a, an chungah match nga aṭanga point 13 hmutu Everton chauh an awm.

Villa hian Pathianni zan khan an mikhualna ramah Leicester City chu 1-0 in an hneh, goal awmchhun hi hun tawp hma chiaha Ross Barkley khung a ni. English midfielder hian Villa tan league match vawi hnih a khelhah goal hnih a khung.

King Power Stadium a inkhelah goal kan hmu dawn lo niin a lang hman, hun pek belhah midfielder Barkley chuan box pawna a ball tlanpui lai chu na takin goal lamah a pet thut a, keeper Kasper Schmeichel dan phak lohin a lut.

Ni dang ang bawkin Villa captain Jack Grealish a hmuhnawm, English midfielder hian goal khung lo mah se an khingpui goal an nawrna kawnga hruaitu pawimawh a ni a, a ke aṭangin ball ṭha bik leh hmuhnawm a chhuak ṭhin.

Foxes lamin striker hriam ber Jamie Vardy chu hliam vangin an chhawr thei lo a, an goal nawr a na tawk lo. Chutihrualin Timothy Castagne leh Nigeria forward Kelechi Iheanacho te khung tur dansaktu Villa keeper Emiliano Martinez-a'n fak a phu hle.

Villa hian kum 90 hnua a vawi khat nan season tir lama an match hmasa paliah hnehna an chang ve leh ta a, season hmasa lama table mawngphah lama talbuai hian nasa takin hma an sawn tih a chiang - kumina an hneh tawh zingah champion lai Liverpool (7-2) pawh an tel.