LZ Juice MPL11 - League round chanve an khel zo

Santosh Trophy leh National Games vangin season dang zawng aiin Mizoram Premier League khelh ṭan hun a hma a, September thla thleng hmain LZ Juice MPL11 league round chanve khelh zawh a ni tawh.

Goal a lut tam

MPL10-ah khan round 7 khelh zawhah goal 88 a lut a, match tina goal 3.14 lut ang a ni a, a lut tam hle. Mahse, MPL11-ah goal a la lut tam zawk.

MPL11-ah goal 108 a lut tawh a, round 7 khelh zawhah MPL10 aiin goal 20-in a lut tam a, match tina goal 3.86 lut ang a ni.

Felix-a goal riat

MPL10 top scorer Lalrinzuala khan goal riat a khung a, tun ṭuma goal khung tam ber Felix Lalruatsanga'n goal riat a khung tling tawh.

Ramhlun Athletic-in semifinal khel pah lo pawh ni se, Serchhip tlangval hian match sarih khel tur a la neih miau avangin goal a la khung belh ngei a rinawm.

Chutihrualin season liam ta khan Rinzuala pawh khan round 7 khelh zawhah goal sarih a khung tawh a, I League leh MPL khelh hun a inrual avangin season chawhnu lamah a inlan tam tawh lo.

Top scorer tur?

Round 7 khelh zawha goal khung tam ber Felix hi top scorer ni turin a dinhmun a ṭha a, chutihrualin a dinhmun hi a la him bik lo.

Aizawl FC tlarhmaa awm Lalbiakdika, C. Lalhriatpuia leh Augustine Lalrochana ten goal nga vek an khung tawh a, match khat lekah engkim danglam vek thei a ni.

BD-a hian goal nga khung turin match nga chauh a mamawh a, hrem a nih avangin match hnuhnung pahnihah a khel lo. Champhai Zotlang tlangval hi a rawn kir leh tawh dawn a, goal nena rawn let a tum dawn.

Aizawl FC striker C. Hriata pawh goal hmaah a hriam zel a, season liam ta khan Electric Veng FC tan khelin goal sarih khungin goal khat chauhin Rinzuala a pha lo. Kuminah erawh I League club hian semifinal an khel ngei dawn a, match khelh tur pawh a ngah sawt dawn avangin goal khung belhna hun ṭha a nei lehzual dawn.

Champion beisei team Chanmari FC aṭangin MS Dawngliana'n goal nga a khung tawh a, Dawngtea hi top scorer tur zingah sawi hmaih a thiang lo. Siphir Venglun forward PC Lalruatsanga leh Police forward F. Lallawmkima ten goal li ve ve an khung a, anni pawh sawi bawk hmak an la rem lo.

Chanmari striker Lalkhawpuimawia'n goal hnih chauh la khung mah se inhliam vangin phase 1 a khel lo tih hriat a ṭha a, match hnuhnung pahnihah goal hnih a khungin a la khung belh zel a rinawm hle.

Engtin zel?

Aizawl FC-in round 7 khelh zawhah goal 23 an khung a; I League club hian Sihphir Venghlun, SYS FC leh Chawnpui FC te goal khung zat belhkhawm aiin goal khat chiahin an khung tlem.

Chutihrualin hneh loh la tawng lo, Chanmari hian goal hnih chiah an la chhuah. Lalsangzuala Hmar hote hian match nga ngawt clean sheet an nei tawh a, tun inelnaa tlarhnung la phui ber an ni.

Goal venhim kawngah FC Bethlehem leh Sihphir Venghlun ten hmasawn an mamawh a, goal 20 leh 21 an chhuah. Goal nawr kawngah SYS FC leh Chawnpui FC te pawh insiamṭhat an ngai, goal 10 an la khung tling lo ve ve.

MPL11 phase 2 hi vawiin aṭangin khelh chhunzawm a ni dawn a, October 1, Thawhlehniah khelh zawh a ni dawn. September thla chawhnu lamah inelna boruak a nung lehzual ang.