Barca tana lei man awm Dani Olmo

Barcelona-in Ilkay Gundogan leh Clement Lenglet an chhuahtir hnuah, an player lak thar Dani Olmo chu squad-ah an ziak lut ve thei ta a, lei man a awm a, nghah man a awm nghal - goal a khung nghal tlat!

Catalan club hian Thawhlehni zan khan Rayo Vallecano chu khualmualah 2-1 in an hneh a, Olmo hian minute 82-naah chakna goal a khung. Hansi Flick hoin league match thum an khelhah vawi thum an chak ta.

Nizan khan Barcelona elpui pakhat Atletico Madrid inlanin, Espanyol an hmachhawn a, he thu buatsaih a nih lai hian result kan hre hman lo. Hetihlai hian Real Madrid chu zanin dar 1:00-ah an inlan dawn a, Las Palmas an lenchilh dawn.

Champion lai Real Madrid hian Kylian Mbappe an neih belh chungin an match hmasa berah point khat chiah an hlawh chhuak a, match hnih aṭangin point li an nei mek - Barca an lo chak zel bawk si a, Catalan club tan 'pressure' a sang sawt ang.

Barakhaih

Vallecano-in anmahni khelmualah Barca chelh din an tum a, an bul ṭan dan pawh a ṭha hle. Mualneitu team tan hian counter attack-ah Unai López chuan Jorge de Frutos-a siamsak chu goal khung nan a hmang a, hetihlai hian minute kua chauh a la ni.

Mualneitu team tan tlarhnung an inrem ṭhat bawk avangin an goal venhim tum mai chu an tan thil finthlak a ni a, Barca tan a harsa sawt thung. Barca hian an si phurh hi sut pawh an sut mai lo a, goal dang lut loin chawlhlawk hman a ni a, Barca fans an hlauthawng.

Barca fan-te dem theih an ni lo a, Vallecano hi team tenau ni mah se, an khelmualah Barca-in chak an harsat tlat. November 2018 hnu khan Barca hi he khelmuala league match an khelhah chak an nei miah lo! Vallecano hi an vanneih zan ni ngat se, chawlhlawk hmaa goal khung belh thei dinhmunah an ding hial zawk.

Mualneitu team tan hian Álvaro García leh Isi Palazón ten chance duhawm an nei ve ve a, mahse, an chance neih an chhawr thei lo a, a tawpah Barca lawmah a tla.

A hunah tak

Flick-a'n player thlak danglam a ṭul tih a hai lo a, minute 46-naah player thar Dani Olmo a luhtir. Spanish playmaker luh hnuah Barcelona game a nung sawt a, Vallecano an talbuai ṭan.

Minute 60-naah Barca hian goal an khung ta nge nge a, Raphinha siamsak chu Pedri chuan si phurh sutna goal ni turin a khung. Mikhual team ṭantute thawm a ring leh ta zawk a, chak an beisei.

Hun tawp nan minute riat chiah a awm tawh a, Barca tan hun ṭha a her chhuak. Player thar Olmo chuan Gundogan chhuahna chhan a ni chu a awm reng a ni tih pholangin, Lamine Yamal-a siamsak chu ṭha zetin goal-ah a chantir.

Barca fans tan an player lak tharin goal a khung nghal hi hmuh a nuam ang a, Barca academy chhuak Olmo-a'n Catalan club tana a match hmasa bera goal a khung nghal hi a theihnghilh lo ang - Vallecano an kir tawh lo a, 2-1 in Barca an chak.

Mumang ram

Sumah Barca an talbuai a, heti chung hian euro maktaduai 60-in Olmo an la lut. A leina tur sum nei mah se, La Liga Financial Fair Play (FFP) hnuaiah dan khirh tak a awm zel avangin Barca-in Olmo an ziak lut thei lawk lo a, an talbuai.

Mahse, player hlawh hnem Gundogan chhuahtirin, Lenglet-a'n loan-a Atletico Madrid a zawm leh tak bawk avangin Barca sum dinhmun a zia ta deuh a, Olmo an ziak lut. An ziah luh zanah squad-ah a awm a, a inlan a, goal a khung nghal - hei lo liama mang ram a awm chuang lo.

Olmo chuan, "Kan game-ah ka lawm takzet a, ka tan chuan duhthusama bul ṭanna a ni e," a ti a, Catalan club tana a match hmasa bera goal a khung nghal chu a lawm hle. Barca boss Hansi Flick chuan, "Barca tana a goal hmasa ber khung tur hian a nghak rei ta hle.

"Olmo a luh hnu khan inkhel kan thunun sawt a, thil thlen danah ka lawm. Olmo a awm chuan ball kan chang tam sawt a, goal khung dan a hre bawk - midfielder tana thil awm ve rengah kan ngai mai thei a, mahse, a ṭha takzet a ni," a ti.

Kir lehna

Olmo hi Barca academy-a inzir ṭhin a ni a, kum 16 mi lek a nihin a chhuahsan - mi rin loh takin Dinamo Zagreb a zawm a, Croatia-a rei tak a cham hnuah RB Leipzig-ah lutin, Spanish player hian German football-ah hming a chher.

Euro 2024-a Spain an champion theih nan player langsar a ni zui a, Olmo chuan, "Barca-a lo kir hi mumang thleng dik a ni. Barcelona-in min duh thu an sawi khan ka inngaihtuah buai lo a, Barca-a ka kir thei hi ka lawm hle," a ti.

Kum 26 mi Olmo chuan sawi zawmin, "Ka duh hunah inziak lut lawk thei lo mah ila, club khan an chingfel mai ang tih kha ka ring sa tlat. Inkhel tura chance ka neih meuh chuan inlan turin ka taksa kha a inpeih tawh takzet.

"Zaninah ka inlan ta a, ka hlim hle. Thil thlen dan ka thlirlet a, ka hlim em em - a hmawr kan bawk ṭha a, team tan result duhawm tak a ni," a ti a, team lawmna chu a pawimawh ber thu a sawi.