Kepa-a'n Bournemouth pan dawn

Khawvela goalkeeper man to ber Kepa Arrizabalaga chuan season khat chhung loan-a khel turin Bournemouth a pan dawn a, Chelsea keeper hlui hian Stamford Bridge a pan tirha beiseina ang kha chu a tawng ngai dawn lo niin a lang.

Kum 29 mi keeper hian kum 2018 khan Athletic Bilbao aṭangin Chelsea a zawm a, a man zat hi pound maktaduai 71 niin, ani aia goalkeeper man to zawk hi tun thlengin an la awm lo - tunah erawh Premier League club tenau tan a khel dawn.

Chelsea hian Kepa hi a thlawn tawpa chân erawh an la duh bik lo a, June 2025-a a contract hmang zo tawh mai tur keeper hi 2025-2026 season tawp thleng an hnena cham turin contract thar an ziah pui a, Cherries-a a loan hun a zawh hunah pawh Blues-ah kum khat hun a la nei dawn tihna a ni.

Kepa hian Blues-a a seaosn hmasa pahnihah chuan hmun pawimawh a chang a, mahse, 2020-21 season aṭangin a tlatlum lo chho ṭan - season hmasa kha loan-in Real Madrid-ah a kal a, Madrid-a cham hlen a duh thu a sawi hial.

Mahse, Thibaut Courtois-a inhliam vanga lak keeper hian a tirah number 1 dinhmun luah mah se, chetsual a chin avangin Andriy Lunin-a'n a nek chhuak a, season hman zawh takah khan Madrid khaw club tan match 20 a khel hman a, La Liga leh Champions League nomawi a chawi.

Real manager Carlo Ancelotti chuan Kepa hi a ngaihven reng tho a, mahse, Lunin chhuah leh chhuah lohah a innghah avangin Spanish keeper hian Cherries-a number 1 ni tura chhuah hi a duh zawk niin a lang.

Kepa hi Chelsea boss thar Enzo Maresca-a hnuaia first team training zingah pawh a tel phak lo a, squad-a tel lo player 14-te nen a hranin training an nei a ni.

Saudi Pro League club Al Ittihad pawhin Kepa hi lakluh tumin an hel a, mahse, Europe-a khelh chhunzawm a thlang. Hetihrual hian Bournemouth hian Arsenal keeper Aaron Ramsdale an rim chu an chawlhsan zui tura ngaih a ni a, an keeper kawl lai Mark Travers pawh a chhuah a rinawm.

Hetihlai hian Chelsea hian Belgian keeper Mike Penders chu Genk aṭangin £17mtd-in an la lut a, mahse, season tharah chauh Blues hi a zawm ang. Steven Gerrard enkawl, Saudi Pro League club Al Ettifaq chuan Blues forward Harvey Vale la lut turin London club hi inremna an neihpui bawk a, Vale-a kutah engkim a awm tawh.