Swiatek tan hna a harsa

US Open hmeichhe inelna lam a ngaihnawm - Iga Swiatek tan match hmasa ber aṭangin a harsa nghal a, champion hlui Emma Raducanu chu a match hmasa berah chak loin Naomi Osaka erawh a chak thung.

World number 1 Swiatek tan hard court hi hmun nuam a ni ngai lem lo, tun ṭumah pawh hian midang inlan theih loh zara tournament khel ve phak chauh Kamilla Rakhimova chu a hneh hram.

Arthur Ashe Stadium-ah Swiatek hian darkar khat leh minute 52 chhungin Rakhimova hi 6-4, 7-6 (8-6) in a hneh a, set khatnaah hian 4-0 in hma hruai thei mah se a hnu lamah erawh vanneihna a mamawh tel.

Polish nula, kum 2022 US Open champion Swiatek chuan, "A harsa lai chu a awm ngei mai, chutihrualin inkhel pumpui thlir kha chuan ka khelh dan phung pangngai kha ka kalsan hla lem lo niin ka hria," a ti.

Inkhel dangah Naomi Osaka chuan Jelena Ostapenko chu darkar khat leh minute thum chhungin 6-3, 6-2 in a hneh a, nau neih hnua tennis khel thar leh Osaka hian tun hma lama a khelh dan ang kha lanchhuah tir leh a tum ruh hle.

Kum 26 mi Osaka chuan, "Season hmasa khan Coco Gauff-ten final an khel lai a hmunah ka en a, mipui zingah ka awm ve reng. Inkhelh ve leh kha ka châk em em a, tunah chuan duhthusam kha a lo thleng dik ve leh ta," tiin a sawi.

Japanese star Osaka hian kum 2018 khan Serena Williams hnehin US Open nomawi a chawi a, a hnu lamah major title dang pathum a lak belh, fa nei tawh mah se a kum a la tam loh avangin ṭha taka khel thei tur a la ni.

Emma Raducanu erawh a zinkawng a tawp nghal - US Open 2021 champion hian Sofia Kenin chu 6-1, 3-6, 6-4 in a hneh lo, nomawi a chawi hnuin New York khawpuiah hian chak ni hmel a la hmu leh lo.

British star hi US Open 2022 khan a match hmasa berah a chak lo a, season hmasa kha hliam vangin a inlan thei lo, kuminah hneh nei loin a zinkawng a tawp leh ta nghal a ni.