Szczesny-a'n inkhelh a chawlhsan

Arsenal leh Juventus goalkeeper hlui Wojciech Szczesny chuan football a chawlhsan, kum 34 mi chauh la ni mah se football khelh chuan a rilru zawng zawng a luah thei tawh lo tih a sawi.

Szczesny hian kum 2006 khan Arsenal a zawm, kum 16 mi chauh la niin Hale End aṭanga inzir chhuak a ni - North London club tan match 181 a khel a, FA Cup pahnih bakah Community Shield 2014 a lakpui bawk.

Arsenal aṭang hian Juventus a zawm - Turin khawpui a lan hnuah match 252 a khel a, nomawi lian tham pariat ngawt a va chawi pui, tun nipui bazarah khan Old Lady hi a chhuahsan ta a ni.

Polish goalkeeper hma hun tur an inrinsiak nasa, sum tamna Saudi Pro League nen sawizawm a ni bawk - nipui bazar a la tawp lo a, club thar nei mai tura a lan laiin social media kaltlangin a chawlh thu hi a puang ta zawk.

Szczesny chuan, "Kum 18 chhung chu ka hmangaih football ka khel a, khang ka hun hmanah te kha ka inchhir lo. Infiamna hmangin ṭhian ṭha ka siam a, khawvela player ṭha ber berte nen hlawhtlinna kan chang ho ṭhin.

"Football hmanga ka mi tawn leh hriatte khan ka nunah thu tam tak an sawi a, nghawng an nei nasa bawk. Kei chuan khatiang hun leh ni zawng zawng te kha ka ngaihlu em em vek.

"Tunah chuan kan taksa dinhmun ka ngaihtuah a, a nihna takah chuan inkhelh hian ka rilru zawng zawng a luah thei tawh rih lo. Ngun taka ka ngaihtuah hnuin chhungkaw tana hun pek a hun tawh niah ka ngai," tiin a sawi.