Durand Cup final-ah Bagan

India rama club football inelna ngaihhlut hlawh Durand Cup pawh a hmawr bawk a hnai leh ta a, August 31, Inrinni zan final-ah Mohun Bagan leh NorthEast United an inhmachhawn ang.

Bagan hian Thawhlehni zan khan semifinal inkhelah Bengaluru chu penalty hmangin an hneh a, final-a Highlander hmachhawn turin an inpetkai.

Salt Lake Stadium, Kolkata-a semifinal inkhelah Bengaluru hian 2-0 in hma an hruai hman a, Sunil Chhetri-a'n penalty hmanga a khung bakah, Vinith Venkatesh chuan goal khat a thawh ve bawk.

Mahse, Bagan hian Dimitri Petratos penalty hmanga si phurh an sut ṭhen hnuah, hun tawp nan minute ruk chiah a awm tawh tihah Anirudh Thapa chuan si phurh a sut zo a, penalty hmangin chak zawk zawn a ni.

Bagan tan Greg Stewart chiahin a hlah laiin, Bangalore club tan Halicharan Narzary leh Aleksandar Jovanović ten an khung thei lo a, penalty-ah Bagan hi 4-3 a chakin final an lut.

August 26, Thawhṭanni zan khan NorthEast United chuan 3-0 a Shillong Lajong sawpin, final an lo lut tawh bawk a, Thoi Singh, Alaeddine Ajaraie leh Parthib Gogoi ten goal khat ṭheuh an khung.