Nomawi palina chawitu Rublev

Coronavirus vanga buaina karah pawh Andrey Rublev tan hun ṭha a in her chhuak zel, tennis season kal laia a nomawi palina turin Rublev hian St. Petersburg Open nomawi a chawi.

Pathianni zan final inkhelah Rublev hian Borna Coric  chu 7-6 (5), 6-4 in a hneh. Set khatna bika tie break an khelh laiin 5-2 zetin hniam hman mah se a tho chhuak a, set hnuhnung zawkah chuan 2-2 a nih hnuah a khingpui service chhuhsakin a tlang.

Hri leng vangin kuminah inelna an nei tam thei lo, world number 1 Novak Djokovic leh Rublev te hian ATP hnuaia inelnaah nomawi pali ve ve an chawi tawh, world number 10 huanga awm hlim Russian tlangval hi ATP Finals khelh beiseiawm zingah a awm mek.