Penalty-ah Atletico an chak

Atletico Madrid-in Champions League quarterfinal thleng turin Thawh­lehni zan khan Bayer Leverkusen chu penalty shootout-ah 3-2 in an hneh.

Vicente Calderon-ah Atletico Madrid-in minute 27-naa Mario Suarez hmangin Bayer Leverkusen an hneh a, first leg-a 0-1 a an tlawm avangin extra time khelh a ṭul. Amaherawhchu goal a luh belh tawh loh avangin penalty pet a ngai ta a ni.

Penalty-ah Atletico tana bench aṭanga lut an che ṭha a, first keeper Miguel Moya inhliam vanga lut Jan Oblak leh forward Fernando Torres chu Spanish club chakna an ni.

Ngaihnawm

Atletico hian Leverkusen hma hian European football-ah penalty shootout-ah ṭum thum an tlawm a, Leverkusen erawhin 1988 UEFA Cup final-ah Espanyol chu penalty hmangin an hneh thung.

Atletico keeper Oblak hi Thibaut Courtois thlakna turin Benfica aṭangin pound maktaduai 12.6 in an la lut a, mahse no. 1 keeper a ni pha lo.

Atletico hian Real Madrid, Bayern Munich, Paris St-Germain, Porto leh Monaco te hnung zuiin quarterfinal an lut.

Leverkusen hian 2002 Champions League final-a Real Madrid an hneh loh hnu khan quarterfinal an la lut leh lo.

Eng nge an sawi?

Atletico Madrid manager Diego Simeone chuan, "Team ṭha pariat zinga kan tel leh thei hi ka hlim a ni. Kan chak chiah khan stadium-a mipui thawm kha a ṭha lutuk a, anni kha team chakna hnar an ni a, an hnathawh kha an hre lo ang tih ka hlau a ni," a ti.

Penalty khungtu Torres chuan, "Cal­deron-a hlimna thlentute zinga ka tel beiseiin Atletico-ah ka rawn let a, zanin ang hi ka lo suangtuah ṭhin chu a ni," tiin an result vanga a lawm thu a sawi.

Bayer Leverkusen coach Roger Schmidt chuan, "Player naupang awm khawmna team kan ni a, tawnhriat kan nei tam tawk loh avangin Atletico khelmualah kan ṭhatna kan lantir thei lo a ni. Tin, penalty shootout-ah kan zauthau hret bawk. Theihtawp chhuah hnua kan chak lo hi a hreawm a, player-te khelh danah erawh ka lawm hle," tiin a sawi.

Bayer Leverkusen midfielder Simon Rolfes chuan, "Penalty shootout hmanga chak zawk zawn a ngaih tawh hi chuan inkhel en let thiam a harsa tawh ṭhin. Kan huaisen tawk lo pawh a ni thei a, kan mamawh tak erawh vanneihna tlem chauh a ni," tiin an vanduai thu a sawi.

PENALTY SHOOTOUT

Atletico: Raul Garcia - Goal lo

Leverkusen: Chalonoglu - Goal lo

Atletico: Griezmann - Goal

Leverkusen: Rolfes - Goal

Atletico: Suarez - Goal

Leverkusen: Toprak - Goal lo

Atletico: Koke - Goal lo

Leverkusen: Castro - Goal

Atletico: Torres - Goal

Leverkusen: Kiessling - Goal lo

FINAL SCORE: Atletico 3-2 Leverkusen