German Grand Prix awm dawn lo

Formula One intlansiak German Grand Prix chu July 17-19 a neih tur a ruahman ni mah se, intlansiak a awm theih loh tur thu Hockenheim boss Georg Seiler-a'n a sawi.

Nikum khan Nurburgring-ah intlansiak hi neih a lo ni tawh a, kum dangah pawh harsatna awm a nih loh chuan neih chhunzawm ṭhin tur a tih a ni. Mahse kuminah neitu thar an awm avangin an beisei angin ruahmanna a awm thei ta lo.

Kumin January thla khan For­mula One boss Bernie Ecclestone chuan Hockenheim-in Germany Grand Prix an thlen tur thu a lo sawi tawh a. Amaherawhchu Hocken­heim boss Georg Seiler chuan intlansiakna hmun tur ruahman nan hun an neih tlem vang leh an hun neih anga an inpeih hman dawn loh avangin kuminah Grand Prix an thlen theih loh tur thu a sawi.

Hockenheim boss Seiler chuan, "Intlansiak thlen ngei hi kan duh, mahse kan hun neihin a daih ngang lo a ni. Neih luih tum ta ni ila a theih maithei mah se a ṭha tawk thei dawn lo," a ti.

German Grand Prix hi an tlan lo a nih chuan kuminah intlansiak vawi 19 chauh a awm dawn tihna a ni a, season bul ṭan fuh tak Mercedes-in an home-ah intlansiak an hmachhawn thei dawn lo tihna a nih bakah German driver pathum Sebastian Vettel, Nico Rosberg leh Nico Hulkenberg ten an ramah intlansiakna hun an nei thei dawn lo tihna a ni.