Pietersen-a tan hun ṭha a tlem tawh - Vaughan

England captain hlui Michael Vaughan chuan England batsman Kevin Pietersen tan ram tana khelh lehna 'chance' a tam tawh lo a ti.

Vaughan chuan, "10% bak England tana khel leh turin chance a nei loin ka hria. England tana khelh theih tawh loh tur thu hrilh a nih hma khan khatih hunlaia England coach, managing director leh captain Alastair Cook te nen an intithiam lo a, khatiang taka buaina lo ngah tawh tan chuan ram tana khelh leh chance hi a tam lo em em a ni. Mahse, county cricket a khelh a, double century te hial a vawchhuak thei a nih erawh chuan en kan ngawt theih a ni lo ang," a ti.

Kum 34-a upa Pietersen hi February 2014 khan England tana koh a nih tawh loh tur thu hrilh a ni. Mahse, tunhnaiah England and Wales Cricket Board (ECB) chairman nimai tur Colin Graves chuan Pietersen chuan county cricket a khel leha a khel ṭha a nih chuan England tan koh a nih leh tur thu a sawi a ni. Tunah hian county cricket club paruk velin Pietersen hi an duh mek niin an sawi.