Company-in player neitu nihna an neih hi Sal chhawr nen khan a danglamna a awm lo - Platini

UEFA president Michel Platini chuan football player-te lei chhawn an nih dan chungchangah an khel mekna club piah lama anmahni 'neitu' nihna nei company an lo awm ve lehzel chu sal chhawr nen danglamna awm loa a hriat thu a sawi.

Football players ṭhen­khat chu an khelh mekna club mai bakah company ṭhenkhatin anmahniah khan 'chan' an lo nei ṭhin a, club danga hralh an nih chiah khan a hralhna man aṭangin hlawkna an lo tel ve leh ṭhin a ni.

Platini chuan a duh loh thu sawiin, "Tuna kan thil sawi mek chungchang hi hmanlai sal inchhawr dan ang chungchang kha a ni. Club mai bakah company ṭhenkhatin player neitu nihna an lo nei ve zel hi keichuan ṭha lo ka ti takzet a, FIFA hnenah pawh ti­tawp tura theihtawp chhuah turin na takin ka nawr tawh a ni," a ti.

FIFA chuan he 'dan' hi tihtawp tumin theihtawp a chhuah mek a, May thlaa FIFA executive an ṭhut­khawm hunah tihtawp anih dawn leh dawn loh an ngaihtuah dawn a ni. He dan hi FA chuan England-ah a lo ti tawp tawh a, tihtawp duh loh zingah Spain leh Portugal te chu a langsar pawl an ni.