Bale luh hnuah Spurs-in goal 3 an chhuah!

Harry Kane leh Son Heung-min-te thil tih ropui vangin Tottenham Hotspur lawmin an au a, an fapa rangkachak Gareth Bale a rawn kir leh tak avanga fans lawmna chu sang tak ni mah se, an phur vanglai takin West Ham nen 3-3 in an inhnehtawk.

Spurs lamin Kane-a goal hnih leh Son goal hmangin 3-0 in hma an hruai a, goal thum an neih hnuah Real Madrid aṭanga an hawh let Bale an dah lut bawk. Jose Mourinho naute hi chiang taka chak tur niin lang mah se, Bale-a luh hnuah Hammers lamin an sut zo, hun tawp hma hreta Manuel Lanzini si phurh sutna goal chu mawi danglam bik a ni.

Premier League season kal laia tlarhma inkawp fuh thlang dawn ila, Spurs striker Kane leh forward Son te aia thlan tur dang an awm bik lo ang. Pathianni zan Tottenham Hotspur Stadium-a inkhelah pawh anni pahnih bawk hi an hmuhnawm.

Hamrik hmasa a rik aṭanga second 45 lekah Kane-a ball fing dawngtu Son chuan goal hmahruai a khung, South Korea international hian ball hlauhawm tak ni a lang lem lo chu box chhungah insiamrem puiin keeper Lukasz Fabianski dan phak lohin a khung.

Spurs an hmuhnawm chhunzawm, Son-a ball pek chu Kane-a'n box pawn aṭangin a khung zui a, English striker hian Sergio Reguilon-a cross tauh lut bawkin minute 16-naah chuan 3-0 in hma an hruai fel der. Old Trafford-a goal ruk khung thei team hian engzat tak khung belh ang maw tih chu zawhna a ni.

London Derby a ni a, hamrik hnuhnung ber a rik hma chuan chak zawk a la chiang lo. Tottenham lamin ball chang tam mah se an khung belh thei tawh lo, Son nen ball an inpek hnuah Kane-a'n hla tak aṭangin goal ban a pet per dawp.

Minute 80 thleng chuan Spurs lamin 3-0 in hma an hruai, minute 82-naah Fabian Balbuena-a'n tauh lutin an si phurh a sut ṭhen a, minute thum lek a liam hnuah Sanchez-a'n harsa lutuk loa tauh chhuah theih tura ngaih chu an mahni lamah a tauh lut.

Moyes-a naute an phur chhunzawm, an freekick hmuh erawhin vanneihna a keng tel - freekick aṭanga Spurs lam ball pet chhuah fuh tawk lo dawngtu Lanzini chuan yard 25-a hla aṭangin goal kilah tak a hlap lut.

Tottenham player ṭhang-duang ni ṭhin, a hunlaia khawvel player manto ber Bale chu Spurs tan a inlan leh ta. Wales international hi hun tawp lam minute 20 la awmah a rawn lut a, freekick an hmuh chu pet zui nghalin goal zawnah a pet.

Kum 31 mi forward hian Kane hnen aṭanga a ball hmuh chu box chhungah mawi zetin a la lalut a, an chak nemnghehna goal khung theihna remchang tak nei mah se goal ban hrulah a pet chhuak hlauh, a vanneih ni a ni lo.

Real Madrid coach Zinedine Zidane-a'n a chhawr duh loh Bale hi a la thiam reng tih a chiang, a fit ṭha bawk a nih chuan EPL tihmuhnawmtu a ni leh dawn.

Kane leh Son-te nen an inkawp rem a nih chuan club dang tlarhnung tana mangchhia an ni thei ang.

Tottenham boss chuan, "Football a ni a, West Ham fak mai ka duh zawk. Second half-a thil thlen dan ka zir chiang ang a, team chhungah kan chingfel ang," tiin Hammers fak mah se hun tawp lama a khelh danah a lungawi lo tih a chiang.

Portuguese manager chuan, "Goal thum an phur a, inkhel kan thunun a, goal chance an nei lo. Mahse an vannei a, vanneih an phue pawh a ni ang. Kan vanduai a, vanduai turin kan khawsa a ni thei bawk.

"Kane-a'n goal ban a per kha lut se 4-0 a ni ang, Bale pawh khan khung se 4-2 nih theihna hun a awm. Kan rilru a paukhauh lehzual a ngai tih a lang, a bik takin second half-ah risk lain min nawr, khatih laia hun remchang kan neih kan chhawr ṭangkai lo kha a pawi," a ti.

West Ham manager David Moyes chuan, "Chawlhlawk lai khan ka naute hnenah first half-ah khan kan khel chhe hran lo tih ka sawi, 4-0 a nih lohna tura khel turin kan infuih. Inkharkhip hnuah hian kan rilru put hmang a dik a, goal khung kan thiamin a venhim lam kan zir erawh a la ngai," a ti.

London derby a ni miau a, derby-ah hi chuan player-in chak duhna leh chak loh hrehna rilru an pu lian a, thil danglam hi a thleng chawk reng a ni.