Zaninah Chelsea Vs Sevilla Frank Lampard dinhmun a him em?

Chelsea-in zanin dar 12:30 hian Champions League-ah Sevilla an mikhual dawn. Spanish club hian season liam ta khan Europa League champion turin semifinal-ah Manchester United an hneh a, kumin UEFA Super Cup-ah pawh Bayern Munich nen an inchai tawk hle. Stamford Bridge-a khelh tur ni mah se Frank Lampard-a hote tan hna harsa a ni ang.

Julen Lopetegui kaihhruai Sevilla hian La Liga-ah Barcelona an chelh thei a, Real Madrid manager hian team ṭha tak a din tih a lang. Europa League-a champion puitu Ever Banega chan mah se Catalan club aṭangin Ivan Rakitic an lalet a, tlarhmaah Lucas Ocampos, Suso leh Luuk de Jong te an awm avangin tlarhnung pawp Chelsea tan fimkhur a ṭul dawn.

Chutihrualin Sevilla hian kartawp khan Granada an hneh lo a, Stamford Bridge-a result ṭha nei turin insiamṭhat an mamawh. Lampard-a hote an danglam lo, Southampton lakah inkhel thunun mah se hun tawpah 3-3 in an inhnehtawk.

Lampard-a'n goal venhim dan a zir ṭhat a ṭul. Blues-in Lampard-a enkawlna hnuaiah league match 43 khel tawhin goal 63 an chhuah a, Chelsea manager zinga record nei chhe ber a ni. Tun season-ah pawh league match vawi nga an khelh aṭangin goal kua an chhuah der tawh.

English manager chuan, "Hun tawp lama huai taka khelh hi ka duh lo. Ka player-te khan ka thu an zawm tawk lo," tiin Southampton lakah a player-ten a thusawi an zawm ṭhat loh thu a sawi a, Sevilla lakah insiamṭhat ngei a tum ang.

Chelsea-in tun season-a league match-a clean sheet an neih ṭumin defender Thiago Silva leh keeper Edouard Mendy ten bul an ṭan a, amaherawhchu Mendy hian Sevilla a la hmachhawn thei lo. PSG defender hlui Thiago Silva-a'n bul a ṭan a rinawm a, Brazilian defender hian a tawnhriat a hman ṭangkai a pawimawh ang.

Tlarhma lamah erawh Timo Werner, Kai Havertz leh Christian Pulisic te an rem thei a, Ajax aṭanga an lakluh Hakim Ziyech pawh a dam tawh. Amaherawhchu Chelsea hian player ṭha nei turin pound maktaduai 220 chuang an hmang tih hriat a ṭha.

London club hian Sevilla an hmachhawn zawhah Manchester United nen an inkhel lehnghal dawn a, an chak lo zawn a nih ngat chuan Lampard a dinhmun thlengin a nghawng tawh ang. 

Coach langsar Massimiliano Allegri leh Mauricio Pochettino te hming a ri ṭan der tawh a, chutihrualin Roman Abramovich hian a fapa chuam Lampard lakah dawhtheihna a neih ngei a rinawm thung.

A êng zawnga thlir erawh chuan Chelsea awmna group-a team dang pahnih hi Rennes leh Krasnodar te an ni a, knockout stage thlen a harsa lo ang.