Virgil van Dijk-a season a tawp dawn?

Liverpool fans tan chanchin lungchhiatthlak a ni - Virgil van Dijk chu a khup hliam vangin zai a ngai dawn. Dutch defender tel loin Reds hian an season hun tam zawk an hman a ṭul dawn tihna a ni. 

Inrinni zan khan Merseyside derby-ah Liverpool leh Everton chu 2-2 in an inhnehtawk a, Toffees keeper Jordan Pickford chuan VVD hi a kalh thlu a, offside phar hman a nih avangin Pickford hi hnawhchhuah erawh a ni lo. 

Premier League champion hian an player chawlh chen tur puang lo mah se a khup hliam hi 'anterior cruciate ligament' (ACL) a ni a, a rei lo berah thla ruk tal chu a chawlh a ngai dawn. 

VVD hi a hma berah April thla tawp lama lo kir thei tura beisei a ni a, a dam meuh chuan Reds-in a tel loin match tam zawk an lo khel tawh dawn tihna a ni - hei pawh hi a ṭha thei ang bera thlirna aṭanga a lan dan a la ni chauh!

Liverpool hian Nilaini zan dar 12:30-ah Champions League match an khel zui dawn a, khualmualah Ajax an lenchilh dawn - Reds hi an league match hnuhnung pahnihah an chak zo lo a, VVD bakah Alisson a inhliam mek bawk. 

Liverpool fans an hnual a, Jurgen Klopp tan a defender chanchin hi hriat a nuam lo leh zual ang. Van Dijk erawh a indawm kun duh lo a, Dutch defender chuan tun hma aia ṭha zawka lo kir a tum thu a sawi. 

Kum 29 mi defender chuan, "Hrehawm ti mah ila, tawrhna phenah malsawmna a awm tih ringtu ka ni a, Pathian puihnain tun aia ṭha, fit leh chak zawkin ka lo kir leh ang tih ka ring tlat a ni," a ti a, a thusawiin beidawn lam a kawk lo. 

Southampton centre back hlui chuan, "Ka hmaa chona inchhawp hmachhawn turin ka inpeih. Tunah chuan ka damna tur ngaihtuahin rilru ka seng a, khelmuala min hmuh leh ngei theih nan theihtawp ka chhuah ang," a ti. 

VVD chuan, "Kan nun ang thoin football-ah pawh hian chhan nei loin thil a thleng ngai lo, hei vang hian hun harsa leh lawm lai pawha talbuai lo tura inbuatsaih a ngai a ni," a ti a, a êng zawngin a thlir. 

Hun rei tak Liverpool tlarhnung pawp tawh hnu siamṭhatu chu VVD a ni a, tun hnai season hnihah khan Reds tan Premier League game zawng zawng a khel kim vek - 2018-19 season-ah pahnihna a nihpui a, season hmasaah a champion pui. 

Champions League 2019-ah a team a champion pui a, Club World Cup-ah nomawi a chawipui zui bawk - Merseyside derby khelh a nih hma khan Liverpool tan tun season bik inelna hrang hrangah match sarih a khel. 

January 2018 a pound makta-duai 75 a Liverpool zawm hnuah league match khat chiah khelh loh a nei a, season hnih a hman tluanah khan club-in league-ah point 196 an hlawh chhuak - pahnihna an nih pawh khan point 97 an nei a, season hmasaah point 99 an hmu. 

VVD tan 2018-19 kha season duhawm a ni lehzual - PFA Player of the Year chawimawina a dawng a, defender zinga a hmasa ber ni turin UEFA Player of the Year a ni bawk. 

Van Dijk-a'n Liverpool tan league match 95-ah bul a ṭan a, hetih chhung hian goal 78 chiah an chhuah a, vawi 44 chu clean sheet an nei thei - Liverpool a zawm hmaa Reds league match hnuhnung 95-ah goal 117 a lut a, match 29-ah goal an chhuah lo. 

Netherlands international hian Liverpool tana a match hmasa ber a khelh hnuah clean sheet vawi 43 a nei thei a, Manchester City goalkeeper Ederson nen anni aia clean sheet ngah zawk January 2018 hnuah an awm lo - Reds tan a thawh hlawk takzet. 

Hei mai a la ni lo - VVD hian goal khung a thiam tel a, Liverpool tana a match hmasa ber a khelh hnuah ani aia defender (10 goals) zinga Premier League goal khung hnem zawk chu Crystal Palace full back  Patrick van Aanholt (11 goals) chauh a ni. 

Liverpool famkim nana VVD thawhhlawkzia hre turin statistics zawng zawng ziak dawn ila, hmun leh hunin min daih lo. Mahse, hei erawh tarlan tel hram a la ngai - VVD telna match (130)-ah Liverpool hian 70% hnehna an chang thei a, a tel loa Reds (13) an khelha an win percentage chu 46% chiah a ni thung. 

Van Dijk a awm dawn loh chuan tlarhnung laia inkawp turin Joe Gomez leh Joel Matip an awm a, player pahnih hi centre back ṭha tak ni mah se VVD pheikhawk hnutchhiah inthawlh zo tura dah erawh an harsa. 

Kum 29 mi Matip hian season hmasa khan league match kua chiah hliam vangin a khel a, a hma season 2018-19 khan match 22 a khel thung. Kum 23 mi Gomez  hian season hmasa khan league match 28 a khel a, 2018-19 season khan vawi 16 a khel thung. 

Gomez leh Matip hian a rualin inkhel bul an la ṭan miah lo - defender pahnih tan fiahna hautak a inchhawp tihna a ni a, bench lamah rawlthar Nathaniel Phillips, Rhys Williams leh Sepp van den Berg an awm bawk. 

Hriat tel tur erawh Liverpool hian Fabinho an nei a, Brazilian midfielder hi a ṭul hunah chuan centre back-a chhawr tlak a ni - hei erawh thil chiang tak a ni, VVD tel loin Liverpool hian ngai an awh lo ang. 

FA chuan VVD hliamtu Pickford chu an hrem zui dawn lo. FA chuan inkhela thil thlengah referee-in a hmuh loh emaw, VAR-a an ennawn loha thil thlengah chuan inkhelh banah thutlukna an siam ṭhin, tiin Pickford hi an hrem dawn lo - VVD erawh an zai dawn!