Wimbledon .Federer-a'n set a la hloh lo

Tennis inelna ngaihhlut Wimbledon sawi ruala mitthla a lo lang ṭhin Roger Federer-a'n a ropui ṭhin tawhna hmunah player chungchuang bik a nih zia a lantir chhunzawm zel. Vawi sarih champion tawh Federer hian Steve Johnson lakah awlsam taka hnehna changin Wimbledon 2016 last 16 a paltlang leh ta.

Thawhṭanni zan khan Centre Court-a inkhel entuten an player ngainat hnehna chang lai an hmu. Seeded pathumna Federer hian darkar khat leh minute 37 chhung lekin seeded 29 Johnson hi 6-2, 6-3, 7-5 in a hneh. Khaw-vela tennis tournament upa berah hian ṭum 14 zet quar-terfinal a luhna chiah niin Jimmy Connors record a nih rual chiah - a khum theih a rinawm.

Swiss thiampuipa Federer hian Wimbledon 2016-ah match li a khelh tawh aṭangin set a la hloh miah lo a, last 16-ah pawh hian a chesual miah lo tih theih a ni. Set khatnaa game rukna leh game riatnaah Johnson service a chhuhsak a, set hnihnaah pawh game linaah a service chhuhsak zui lehin dinhmun hlauhtawhawmah a ding lo.

Set hnuhnung berah John-son hian kum 34-a upa Federer service chhuhsakin 5-5 ni hmanin beisei a nei ve hman. Mah se American tlangval hi hnehna chang turin a khel ṭha chhunzawm lo a - a beiseina a thamral zui bawk.

Mipa player zinga Grand Slam champion hnem ber Federer hi kum 2012 khan he hmunah hian a lo champion tawh a, hemi hnu hian major tournament-ah a la hlawhtling leh lo. Wimbledon bikah hian vawi sarih champion tawhin Pete Sampras leh William Renshaw te nen an intluk tawk rih - hranghlui player ropuite sulhnu khum tur chuan quarterfinal-ah 2014 US Open champion Marin Cilic a paltlang leh phawt a ṭul ang.

Wimbledon final vawi 10 khel tawh Federer chuan,"Best of five match hi chu engtik lai mahin a awlsam ngai lo, rilru sawrbing ka la ngai a, a hmawr bawk hun a la hlat avangin thil a la inthlak danglam thei hle," tiin champion tura hmabak a la tam thu a sawi.

Grand Slam vawi 17 cham--pion tawh chuan sawi chhunzawmin, " Chawlh hah-damna hun neih theih hi duhthusam a ni a, ka inkhelh hmasak paliah straight set-a hnehna ka chang thei hi ka lawm," a ti. Semifinal a a hmachhawn tur thlir zuiin, "Cilic hian US Open aṭangin min lo hnawt chhuak tawh a, inkhel hautak a ni dawn. Ani hneh tur chuan ṭha taka ka khelh a ngai dawn," tiin a sawi bawk.

Hei le Murray...

Tennis ngaina hnam Bri-tish miten tualchhung mi ṭan rawn tur an mamawh a, a chhanna chu Andy Murray hi a ni. Centre Court-ah 2013 champion Murray hian Nick Kyrgios lakah 7-5, 6-1, 6-4 in hnehna a chang a, tun inelnaah hian Federer ang thoin set a la hloh miah lo - grass court bikah tun hnaiah hian a zawnin match riat hnehna a channa chiah a ni bawk.

Seeded pahnihna Murray hian Pete Sampras leh John McEnroe te record lo siam tawh a zawna Wimbledon quarterfinal vawi kaw luh theih chu a rawn nihrual ta chiah a, semifinal thleng turin France tlangval Jo-Wilfried Tsonga a paltlang leh a ṭul ang.

Kum 29-a upa Murray leh seeded 15-na Kyrgios te hi an inkhelh ṭan hma khan inthlau lutuk tura ngaih an ni lem lo. Mahse, world number 2 Murray-a'n harsa taka set khatna a lak hnuah Australian rawlthar hi a talbuai chhunzawm a, hnehna chang let turin huaisenna a neih loh bakah nidanga a khelh dan phung pawh a phak lo.

Grand Slam vawi hnih champion tawh Murray chuan, "Set khatna kha a hautak hle 6-5 a nih laia a service ka chhuhsak thei hlauh kha ka vannei a, a hnulam kha chu a awlsam tawh. Tsonga ka hmachhawn zui dawn tih ka hre tawh a, ani hi grass court-ah chuan player hlauhawm tak a nih avangin chetsual hlek pawh a thiang lo ang," tiin a sawi.

Last 16 inkhel dangah seeded parukna Milos Raonic-a'n set hnih a hloh zet hnuah a huaisen zia lantirin David Goffin chu 4-6, 3-6, 6-4, 6-4, 6-4 in a lehthal. Kum 25-a upa Raonic hian 2014 khan semifinal a lo lut tawh a, kuminah hian player beiseiawm pawl tak niin quarterfinal-ah chuan a service na tak hmanga world number 1 Novak Djokovic vaw thlatu Sam Querrey a hmachhawn zui leh dawn.

Vanduaina!

Seeded pangna Kei Nishi-kori chu third round an khelh laiin ṭum hnih ngawt enkawl a ngaih hnuah hnehna chang thei mah se last 16-ah erawh a ṭang zo ta lo. Japan tlangval Nishikori hi Marin Cilic nen an inhmachhawn ṭumin a nak ruh na vangin a buai leh a, 6-1 5-1 a a hnufual zawk laiin a inkhelh chhunzawm thei ta lo a ni.

Inkhel dangah French tlang-val pahnih an inhmachhawn a, Richard Gasquet chu seeded 12-na Tsonga nen an inhmachhawn laiin a hnungzâng na vangin set khat pawh a khel zo thei lo. Tsonga-a'n 4-2 a hma a hruai laiin Gasquet a inhnukdawk.

Tomas Berdych leh Jiri Vesely te inkhel a hmuhnawmin an inhnehtawk a, set hnih ve ve lain set hnuhnung ber an khelh hmain eng (light) chhiat vangin inkhelh chhunzawm theih a ni lo a, nimin tlai khan khelh chhunzawm leh tura ruahman niin he thu buatsaih lai hian result kan hre hman lo thung.