Ka duhna hmun takah ka awm - Mourinho

Manchester United manager Jose Mourinho chuan, "Mi zawng zawng thawh châk a ni a, kei hi mi vannei tlemte zinga mi ka ni, supporter-te'n ka chunga an beisei pawh ka hria. Ka chona hmachhawn hian min tihlauthawng lo a, ka mamawh hunah tak ka hmaah a rawn inchhawpin ka hria. Hei hian phurna min pe a, England-a awm ka duh a, United enkawl hi ka duhna a ni. Tunah hian ka duhna hmun takah ka awm a ni," tiin a hna thar chu a fak thiam hle.

UCL chungchang

United-in FA Cup an champion zawhah Louis van Gaal an ban a, Dutch manager chungah hian Champions League an khelh phak loh vangin an duh khawp an hmu lo a ni ber.

Europe-a inelna sang ber an khelh theih loh tur chungchang sawiin kum 53-a upa Mourinho chuan, "Champions League kan khel lo tur hian minti hrilh hai a, kum khat bak a nih loh ka beisei. Ka hmalam hun atan Champions League khelh leh hi kan tum hmasa ber tur ti ta ila, ka tan chuan a ṭha ang. Mah se hetiang hi ka thiam zawng a ni ve lo - ṭha naran nih ka duh lo, kei chuan champion ka duh a ni," tiin a sawi.

Champion duh chu

Champion duha a tuihal thu sawi zuiin Portuguese manager chuan, "Engkim ka duh, inkhelh apianga chak ka duh a, ṭha taka khelh ka duh a, goal chhuah ka duh lo. Fan-te'n min ṭawiawm reng ka beisei, kan duh ang zawng zawng chu kan nei vek dawn lo a, mah se engkim ka duh a ni. Manager zingah kum 10 chhunga nomawi la chawi leh miah lo te an awm a, nomawi la dawng miah lo pawh an awm. Kei erawh nomawi ka chawi hnuhnun ber chu kum khat pelh awrh chauh kha a ni. Ka theihna phochhuah leh a ṭul a nih chuan coach dang pawh ngaihtuah ve ula. Kei chuan midang tan ni lo ka tan ka theihna hi phochhuah a ngai a ni. Hlawhtlinna tel loa hnathawh hi ka thiam lo a ni," tiin chak a duh zia a sawi.

Player palina

United hian Zlatan Ibrahimovic leh defender Eric Bailly an lalut tawh a, Borussia Dortmund aṭangin Henrikh Mkhitaryan an lalut chiang tawh bawk.

Mourinho chuan, "Khelh dun dan ka nei a, chumi khel thei tur player
ṭha bik ka duh. Player pali lakluh ka tum a, pakhat kan la hmabak. Ka duh ang kan neih hma chu kei, Woodward leh club neitu hoin theihtawp kan chhuah ang. August 31-a (Transfer tawp ni) player palina lak ka duh lo, hemi hma ngei hian kan lalut ang a, team tlo ṭha tak kan din thei ang," tiin khelhdan turah dun dan a neih thu leh chumi mila ruahmanna an kalpui thu a sawi.

Player naupang

Player naupang a chher chhuak loh anga an sawi chungchang chhang letin Mourinho chuan, "Academy
aṭanga senior team-a player naupang ka chhawr tawh zat chu 49 a ni. Chumi tur chuan thil pahnih pawimawh tak a awm. Pakhat chu inhliam ngah vanga loh theih loa chawr a ni a, pahnihna chu player-te'n beisei an phak loh chuan naupang zawk chhawr a harsa lo," tiin a sawi.

Van Gaal hnuaiah United-in player inhliam an ngah a, Mourinho chuan, "Ka hnuaiah player inhliam an tlem ṭhin hle. Player naupang hi mamawh vangin ka chhawr ngai lo a, ka rintawk vangin ka chhawr
ṭhin. Leicester champion ṭum chiah kha season tawp thlenga champion thei dinhmuna ka din loh vawi khatna a ni. Ṭum dangah chuan ka champion loh chuan pahnihna ka ni
ṭhin a, season tawp thlengin cham-pion beiseina ka nei ṭhin bawk," tiin a record chu a chhuang hle.

Rooney chungchang

Mourinho chuan, "Striker ni turin a ṭha tawk lo a ni thei a, a postion hi no. 9 turin a ṭha tawk lo a ni thei bawk. Amaherawhchu ka hnuaiah chuan no. 6 hna a chelh dawn lo a, goal aṭanga metre 50-a hlaah hian a awm dawn lo. Ka hnuaiah chuan no. 9 a nih loh pawhin no. 10 hna a chelh dawn a, no. 6 emaw no. 8 hna chu a chelh ngai lo. Goal khung hi pianpui a ni a, thlak danglam theih a ni lo, hei hi Rooney hian a nei reng ang," tiin Manchester United captain chunga rinna a nghah thu a sawi.

Jose Mourinho-a'n United mana-ger a nih hnua press confe-rence a hmachhawn hmasa berah inrintawkna a la hloh lo tih a chiang a, tun hmaa a tih ṭhin dan pangngaiin manager dang tana hriat nuam lo tur a sawi lang zeuh zeuh bawk.