Euro 2016. Tu nge Golden Boot dawng dawn?

European Championship 2016-a goal khung tam berin adidas golden boot a dawng dawn a, quarterfinal khelh zawha hmahruaitu chu goal li khung thei awmchhun France forward Antoine Griezmann a ni.

France coach Didier Deschamps chuan, "Top Scorer dinhmun hi inelna tawp thlenga a luah theih chuan atan chuan chanchin lawmawm a ni ngei ang," tiin Griezmann-a tan Golden Boot a hlut thu a sawi.

Golden boot dawng tur hi goal khung hmanga teh a ni a, goal khung zat a inang erawh chuan an ṭhiante goal khung tur siam (assists) tam zawk chuan chawimawina an dawng ang. Tehna pahnih hman hnua a la inang cheu chuan khelmual chhunga hun hmang tlem zawkin golden boot an dawng dawn.

Griezmann hian goal li a khung tawh a, Atletico Madrid striker hnaih bertu chu a kawppui Olivier Giroud a ni. Arsenal striker bakah hian Dimitri Payet, Gareth Bale leh Alvaro Morata te'n goal thum an khung tawh. Spanish striker Morata tih loh hi chuan golden boot an la beisei thei vek a. Goal hnih khung tawh zinga mi Portuguese forward Cristiano Ronaldo leh Nani te hming hi dah bo a la thiang lo bawk.

Golden boot vanga buaina?

France tlarhma pathum Griez-mann, Giroud leh Payet te hian golden boot dawn duh vanga an-mah-ni hma an sial chuan buaina a awm thei a, tun dinhmunah erawh a awm lo. Giroud-a'n Iceland lama a tauh goal khan Payet-a freekick aṭangin a ni a, quarterfinal-ah tho hian Hammers midfielder hian Griezmann-a khung tur a siam sak bawk a, Payet-a khung tur siam saktu chu Atletico forward a ni.

France midfielder Payet chuan, "Grizou (Griezmann) nen hi chuan kan inhre thiam a, anni anga player talent nei ṭha khelhpui hi chu a awlsam a ni. Khelmual chhungah kan inhmu zung zung a, harsatna siam zawngin kan khel lo," tiin buaina an neih loh thu a sawi.

Iceland an khelh ṭum khan Arsenal forward Giroud chu goal hnih a khung hnuah lakchhuah a ni a, Deschamps-a'n golden boot dawng tura Griezmann a duhsak vang ni loin yellow card a chawi leh a hlauh vang zawk a ni. Giroud hian Griezmann-a tan vawi tam ball ṭha a siam sak a, Republic of Ireland an khelh ṭuma Atletico forward goal khung kha Arsenal forward siam sak a ni tih hriat tel a ṭha bawk.

Goal khung tamte

# Player Team Goals Asts Pld Min

1 Antoine Griezmann France 4 2 5 345

2 Olivier Giroud France 3 2 4 300

3 Dimitri Payet France 3 2 5 377

4 Gareth Bale Wales 3 1 5 443

5 Alvaro Morata Spain 3 0 4 289

6 Cristiano Ronaldo Portugal 2 2 5 510

7 Radja Nainggolan Belgium 2 1 5 365

8 Ivan Perisic Croatia 2 1 4 387

9 Jakub Blaszczykowski Poland 2 1 5 445

10 Nani Portugal 2 1 5 500

11 Hal Robson-Kanu Wales 2 0 4 206

12 Bogdan Stancu Romania 2 0 3 264

13 Mario Gomez Germany 2 0 4 271

14 Balázs Dzsudzsak Hungary 2 0 4 360

15 Graziano Pelle Italy 2 0 4 360

16 Robbie Brady Republic of Ireland 2 0 4 360

17 Romelu Lukaku Belgium 2 0 5 402

18 Kolbeinn Sigthorsson Iceland 2 0 5 404

19 Birkir Bjarnason Iceland 2 0 5 450

Note : Asts = Assists; Pld : Matches Played; Min = Minutes Played