Mizoramin beisei tlem an la nei

Junior Girl's National Football Championship-ah nimin khan Mizoramin Grace Lalrampari leh B. Vanlalhriattiri te goal hnih ve ve khung hmangin Chandigarh 4-1 in hneh mah se goal difference-ah Pondicherry an tluk lo.

Vawiin hian Cuttack, Odisha-ah group stage khelh zawh a ni dawn. Pool D aṭangin Pondicherry hi hmahruaitu an ni a, Mizoram hi pool pasarih pahnihna aṭanga point hmu sang ber an nih chuan quarterfinal an lut ve thei ang.

Mizoram hian an match hmasa berah Pondicherry laka goal hnih an khung an hum zo lo a, 2-2 a an inhnehtawk avangin point khat chiah an hlawh chhuak. Pondicherry hian Chandigarh chu 7-0 in an hneh chhunzawm a, Mizoram hian goal difference-a an tluk tak loh avangin tla thei dinhmunah an ding.

Mizoram coach Lalnunsangi chuan, "Training hun kan neih
ṭhat loh ai chuan kan khelṭhain ka hria, state dangin tih takzetin inbuatsaihna an kalpui a, an hmasawnna pawh hmuh theih a ni. MFA pawhin hmeichhe lamah ngaihtuahna an seng ṭan a, hma kan sawn ve zel ka beisei," tiin Vanglaini palai a hrilh.