Williams unau an vul zel

Serena Williams leh Venus Williams te chu Wimbledon ti hlutu an lo nih tawh ṭhin ang ngeiin kuminah pawh player hmuhnawm an nih chhunzawm zel. Thawhlehni zan khan Williams unau hian an khingpui ve ve hnehin quarterfinal an lut.

Ruah sur vangin inkhel ṭhenkhat a hun sawn a ngaih bakah a tukah te chhunzawm leh a ngai fo. World number 1 Serena pawh a zawnin ni thum chhung a inkhel tawh - a ṭum 12 nana Wimbledon last 16 paltlang tur hian seeded 13-na Svetlana Kuznetsova chu 7-5, 6-0 in a hneh.

Centre Court-ah bik hi chuan Serena hi a khel ṭha ṭhin a, he hmunah hian a zawna match kua hnehna chang tur hian ace vawi kua siamin nizan khan quarterfinal-ah Russian star Anastasia Pavlyuchen-kova a hmachawn zui lehnghal a, result kan hre hman lo.

Kum 36-a upa ni tawh mah se Venus hi a la tar lo tih court chhungah kan hmu. Spain nula Suarez Navarro lakah set hmasa berah 3-0 in hnufual mah se vawi nga champion tawh a nihzia lantirin 7-6, 6-4 in hnehna a chang let a, quarterfinal a lut. Nizan khan ruah surin a tibuai lo emaw harsatna dang a awm a nih hran loh chuan hmeichhe single quarterfinal hi khelh zawh tura ruahman a ni.

Mirza leh Hingis pawh

Champion lai Sania Mirza leh Martina Hingis te chuan minute 46 chhung lekin Christina Mchale leh Jelena Ostapenko te ṭangdun chu 6-1, 6-0 a hnehin Wimbledon hmeichhe double quarterfinal an lut.

Indo-Swiss duo te hian tun inelnaah hian match thum an khelh tawh aṭangin set an la hloh lo a, third round-ah pawh hian an khingpuite service ṭum nga ngawt an chhuhsak theih bakah an service an hum tluan thei a ni.