Ronaldo vs Bale : Portugal hmaah Wales Zaninah tu nge dingchang zawk dawn le?
Real Madrid-ah Cristiano Ro-naldo leh Gareth Bale an khel dun a, zaninah erawh khawvel footballer ṭha ber zinga chhiar hmaih thiang lo player pahnih hi ram tan Euro final luh inchuhin an inhmachhawn dawn - hei hi khawvel hmuh châk a ni.
Wales manager Chris Coleman chuan, "Bale leh Ronaldo hi khawvela player ṭha ber pawl an ni a, an inpawh em em. Zaninah erawh inkhelh zawh hma chuan inṭhianṭhatna tih velin hmun a chang tur a ni lo a, tun hi hmangaihna lantir hun a ni lo," tiin thil awm dan thiam takin a sawi.
Team pahnihin chak lo zawk nih an duh dawn lo - zanin dar 12:30-ah engkim chinfel a ni ang.
Beisei sang Ronaldo
Portugal captain Cristiano Ronal-do chuan, "Kan mumangin a tak ram a hnaih zel a, engpawh thleng thei a ni tawh. Nomawi chawi hmaih nei angah ka inngai lo a, vawiinah hian ka career hi tawp mah se chhuang takin ka thlir let thei ang. Mahse, ram tana nomawi pakhat tal chawi ka châk tih erawh zep ṭul a ni lo a, kawng dik kan zawh mek a ni," tiin a sawi a, a career hmanah a lawmthu sawi mah se Portugal tana nomawi chawi a duh tih hi hmuh hmaih chi rual a ni lo - zaninah a theihna zawng zawng nen a khel ang.
Semifinal hial thleng mah se Portugal hian an Euro zinkawngah chhuan tur an nei tlem hle - group stage-ah pathumna nichungin last 16 an lut a, match nga an khelh tawhah hun pangngai 90 minute-a chak nei lo mah se extra time leh penalty chhawr ṭangkaiin semifinal hial an thleng ta - final an mitthla tawh ngeiin a rinawm.
Bale-a inngaitlawm
Wales innghahna Gareth Bale chuan, "Kan inkhel tur hi player pahnih chungchang ringawt a ni lo a, ram pahnih semifinal-a inhmachhawn tur chungchang a ni. Player pakhat ve ve inhmachhawn tur a ni lo a, 11 ve ve inhmachhawn tur kan ni," tiin an inkhel tur chu Ronaldo leh Bale aia a ropui zawk thu a sawi.
Bale chuan an thlen thui chhan sawiin, "Wales kawr kan hak tawh chuan hei aia chawimawina ropui zawk hi kan tan a awm chuang lo. Slovakia nen kan inkhelh dawna kan hnam hla an play lai khan kan hnuk a ulh a, hmulthi a ding sung sung thei a ni. Hei hi Wales chu a ni a, he kawr kan hak tawh chuan kan theihna zawng zawng kan pe ṭhin," tiin rin kai lo chunga semfinal hial an thlen theih chhan a sawi chhuak.
Ramsey tel loin
Wales-in semifinal an luh theih-na kalkawnga player pawi-mawh ber pawla chhal ngam chu Aaron Ramsey a ni. Mahse, Arsenal midfielder hian yellow card pahnih a chawi avangin Portugal a hmachhawn thei dawn lo a, Tottenham Hotspur defender Ben Davies chu hrem vang thoin a inlan thei lo bawk ang.
Mahse, Ramsey chuan a tel lo pawha Portugal an hneh theih tur thu sawiin, "Ka tel lo pawhin Portugal hi kan hneh thei ang tih ka chiang a, ka ṭhiante hian final-ah Wales min hruai thlen ngei ka beisei a ni," tiin a ṭhiante a ringtawk hle.
Chris Coleman-a'n Ramsey aia khel turin Andy King a la nei cheu a, mah se Leicester City midfielder hi tlarhnung ti chak tura chhawr ṭhin a nih zawk avangin Crystal Palace midfielder Jonny Williams chuan Ramsey ai hi a awh a beiseiawm zawk a, tlarhnung lamah Davies aiawha lut turin West Ham defender James Collins chu beisei a ni.
Pepe a chiang lo?
Portugal-in hrem vangin an player zingah defensive midfielder William Carvalho chu yellow card pahnih hmuh vangin an chhawr thei dawn lo. Hei aia chanchin lawmawm lo lehzual chu an defender rinrawl Pepe inhliam hi a ni.
Real Madrid defender hian nimin khan malpui hliam vangin Portugal training a zawm lo a, zaninah a inlan theih dawn leh dawn loh a chiang lo - Gareth Bale hrechiangtu defender hi a inlan thei lo a nih chuan Portugal tan channa nasa tak a ni dawn.
Mahse, coach Fernando Santos-a'n, "Pepe hi kan player ṭangkai tak a ni a, a thiamna piah lamah khelmual chhunga ṭhiante kaihhruai thiam tak a nih avangin kan tan chuan kan player pawimawh ber zinga mi a ni," tiin nimin khan Pepe chungchang a sawi a, a defender pawimawh hi inlantir ngei a tum niin a lang.
Euro zinkawng
Tun hmain Portugal leh Wales hi competitive match-ah an la inhma-chhawn ngai lo a, friendly match-ah erawh vawi thum an inhmachhawn tawh thung - Portugal an chungnung zawk a, vawi hnih hnehna changin vawi khat erawh Wales an chak ve.
Portugal-in semifinal an luhna kawnga an player goal khung hnem ber chu Cristiano Ronaldo leh Nani te an ni a, Manchester United player hlui pahnih hian goal hnih ve ve an khung tawh. Semifinal hmaa an match apiangah 54% zel ball chang ang an ni.
Kum 2004 Euro finalist Portugal hian semifinal-ah record chhuanawm sawi tur an nei lo - vawi li a thiam pali zinga an inhlankai tawhah vawi khat chiah hnehna an la chang ve, a vawi khat nana semifinal khel tur Wales-in hei hi an rilruah an hre reng ang.
Wales tan an semifinal zin-kawng-ah Gareth Bale chuan goal thum khungin a khung hnem ber a, a goal khungte hi group stage-a a khung vek an ni thung. Wales-in inkhelh apiangin 47% ball chang ang an ni a, vawi 59 goal khung tuma an beihnaah vawi 10 an khung thei - semifinalist zinga chance neih chhawr ṭangkai ber an ni.
Thukhawchang
Wales manager Chris Coleman chuan, "Player-te nen kan thawh-hona a ṭha em em a, hei hi kan chakna hnar pakhat a ni. Ka player-ten game plan an hrechiang a, an tihtur an hre vek a ni. Hlauh nei miah loin ka naute an khel ṭhin a, an rilru huaisennain a rahchhuah chu kan hmu vek. Hetiang rilru puthmang nen chuan eng team pawh hmachhawn dawn ila hlauh kan nei lo," tiin Portugal hmachhawn tura an inpeih thu a sawi.
Team pangngai training naah Gareth Bale hmuh tur a awm lo a, a hranin training a nei. Mahse, Real Madrid forward chuan, "Hliam tenau ka neih avangin midang ruala ka in fit theih nan training hi a hrana la ka ni a, engmah hlauhthawn tur a awm lo," tiin a sawi a, Portugal hmachhawn ngei a tum.
THLIRNA TAWI
STARTING XI TURA RIN
Portugal : Rui Patrício; Cédric, Pepe, Fonte, Guer-reiro; Danilo, João Mário, Adrien Silva, Sanches; Nani, Ronaldo.
Wales : Hennessey; Chester, A Williams, Collins; Gunter, Allen, Ledley, J Williams, Taylor; Bale, Robson-Kanu.
HREM VANGA KHEL LO TUR
Portugal : William Carvalho
Wales : Ben Davies, Aaron Ramsey
DINHMUN CHIANG LO
Portugal : Pepe
SEMIFINAL KALKAWNG
Portugal : 1-1 Iceland, 0-0 Austria, 3-3 Hungary, 1-0 Croatia (aet), 1-1 Poland (5-3 pen)
Wales : 2-1 Slovakia, 1-2 England, 3-0 Russia, 1-0 Northern Ireland, 3-1 Belgium
MATCH INFO
Stadium : Stade de Lyon, Lyon
Mipui leng zat : 58000
Referee : Jonas Eriksson (SWE)
Assistant referees : Mathias Klasenius (SWE), Daniel Warnmark (SWE)
Fourth official : Szymon Marciniak (POL)