Hei le Guardiola! Manchester United a bei nghal

Premier League season tharah coach ropui tak tak Arsene Wenger (Arsenal), Antonio Conte (Chelsea), Jurgen Klopp (Liverpool), Jose Mourinho (Manchester United) leh Pep Guardiola (Manchester City) te kan hmu dawn a, ṭum dang zawng aiin Premier League-in ngaihven a hlawh.

Manager ropui rual zingah club inhal Barcelona leh Real Madrid manager lo ni tawh Pep Guardiola leh Jose Mourinho te Manchester Derby-a an inhmachhawn tur hian chil a ti put zual - manager ṭawng tam lo Guardiola chuan Thawhlehni khan an club training hmasa ber a neihpui a, Manchester United a kap nghal!

Bayern Munich manager hlui chuan, "Tunah hian Champions League khel tur chiang kan la ni lo a, playoff khelh kan hmabak. Mahse, kan dinhmun hi Champions League beisei tur pawh nei lo Manchester United ai chuan a ṭha zawk a ni," a ti - Mourinho-a'n engtin tak chhang ang maw?

Hmana an duh loh kha

Barcelona player hlui Pep Guardiola hian kum uaithla tawh lam a nih hnuah player a nih laiin Manchester City-ah trial a nei a, hetih hunlaia Premier League club vantlang hian kum 34-a upa defensive midfielder hi duh loin an hnawl a, City boss Stuart Pearce-a ngaihtuahna a tibuai pha lo - tunah erawh sum tam tak nen City-in an manager ni turin an ruai ta!

Kum 45-a upa manager chuan a hun tawn thlir kirin, "Khatih lai khan kum 34-a upa ka nih tawh avangin Stuart Pearce-a'n min thlang lo kha thutlukna dik a ni. Premier League-a khelh kha ka duhthusam a ni ṭhin a, Pearce khan thla ruk chhung atan chuan min duh ngei. Mahse, City pan loh mai kha ka chhungte nen kan inrawn hnuah kan ti thlu ta a ni," tiin a sawi - player a nih laia a khelh châkna hmunah khawvela coach hlawhtling ber pawl nichungin Pep a inlan dawn e!

Thinlai luahtu

Barcelona-a season li a cham chhunga nomawi 14 chawi thei Pep Guardiola chuan Manchester City-a a player te chuan a ngaihtuahna an luah reng tur thu a sawi a, amaha in-nghat ngam turin a player-te a chah - a thlamuanthlak khawp ang.

Guardiola chuan, "Ka player-te hian eng angin nge min ngaih ka hre lo a, an hriatreng atana ka duh erawh darkar 24 chhungin ka ngaihtuahna an luah reng ang. Ka hna hi nuam ka ti a, ka hnathawh hi ka hmangaih a ni. Ka player-te hian he hmunah hian anmahni chauh ngaihtuah chunga hnathawk turin ka lokal tih hi an hre tur a ni," tiin thildangin a rilru an luah loh thu a sawi.

Bayern Munich-a season thum a cham chhunga Bundesliga nomawi chawi vek thei manager chuan sawi chhunzawmin, "Nasa taka ka ngaihtuahna ka sen hnuah player khelhtir tur ka thlang ṭhin a, ka thawhrimzia hrethiam loin player
ṭhenkhat chu an thinrim ṭhin. Mahse, ka game plan leh ngaihtuahna ka sen dan an hriatthiam chuan ka player-te nen inpawhna ṭha tak kan nei ang," tiin a tumah a chiang hle.

Nomawi beiseina

Guardiola hian Barcelona a enkawl chhungin Champions League nomawi vawi hnih chawi hman mah se Bayern Munich-ah season thum chhung a zawnin semifinal a lut a, final erawh a thleng phak ngai lo - sum ngah Manchester City-in Guardiola an lakluh chhan hi Champions League nomawi chawi an duh vang nia ngaih a ni.

Mahse, Guardiola chuan nomawi chawi tur chuan a player-ten a thu an awih phawt a pawimawh thu sawiin, "City ka pan hnua mi tam tak rilrua zawhna lo awm nghal chu nomawi eng zat nge i chawi ang? tih hi a ni. Chumi tur chuan training neih ṭhatte, hmun hma neih ṭhat leh ka tactic hmante player-ten an zawm a ngai a, chumi tur chuan player-te rilru ka hmin hmasak phawt a ngai a ni," a ti.

Pep chuan Barcelona leh Bayern Munich-a a hlawhtlinna ang kha Manchester City-ah pawh neih theih a inbeisei thu sawi nghalin, "He club-ah hian nuam ti taka ka thawh theih ka beisei a, he hmuna hnathawkte hian min thlawp ka beisei tlat a ni. Chu thawhhona ṭha avang chuan Barcelona leh Bayern-ah ka hlawhtling a, he hmunah pawh hian chu chu a thlen ngei ka beisei," tiin hlawhtlinna an chan ngei a beisei thu a sawi.

Coach ṭha bik

Barcelona B team aṭanga a coaching career ṭantu Guardiola hian July 2008-a Barcelona a enkawl hnuah Catalan club hi match 247 a khelhpui a, vawi 179 hnehna chanpuiin a hnehna chan zat hi 72.47% lai a ni thei. Bayern Munich a enkawl hnuah match 161 kaihruaiin vawi 121 hnehna a chanpui a, a hnehna chan zat hi 75.16% niin Barcelona aiin a la ṭha zawk - City-ah eng tak ang ang maw?

Guardiola-a'n City coach a nih hnuah midfielder Ilkay Gundogan, Spanish forward Nolito leh Ukraine rawlthar duhawm Oleksandr Zinchenko te a lalut a, an zinga player langsar bera chhal ngam chu Dortmund aṭanga a lakluh midfielder Gundogan a ni.

Kum 25-a upa midfielder chuan a pu hi fakin, "Guardiola hi chu amah ngaina lotute pawn ṭha an ti vek a, entirna ṭha ber chu Zlatan Ibrahimovic a ni. Ibra leh Pep hi an ingaina lo tih chu kan hre vek a, mah se Swedish striker hian a lehkhabuah Pep chu a coach hrawn tawh zinga
ṭha a tih ber a nih thu a ziak a ni," a ti.

Inter Milan-ah Mourinho leh Ibra an thawk dun tawh a, Gundogan
ṭawngkam hi Portuguese manager tan hriat nuam a ni hauh lo ang - Premier League ṭan a nih hma hauhin khelmual pawn lamah Manchester khaw club pahnih an inkap tawn sak sak reng.