Palace-ah West Ham defender

Crystal Palace chuan Premier League-a an elpui West Ham a-ṭangin James Tomkins an lalut, Hammers defender man zat hi pound matkaduai 10 niin kum nga daih contract a ziak.

Season thar atan Palace hi an inthuamṭha mek a, kum 27-a upa Tomkins an lakluh hma hian midfielder Andros Townsend leh goalkeeper Steve Mandanda an lo la lut tawh bawk.

Tomkins hian kum sarih mi chauh a nih laiin West Ham academy hi a zawm a, first team tan match 243 khel tawhin goal 11 a khung hman.

Palace chairman Steve Parish chuan Tomkins chu an manager Alan Pardew player duhzawng tak a nih thu sawiin, "Lakluh tuma kan hel reng a ni a, ani kan chang thei hi kan vannei hle," a ti.

Tomkins chuan Pardew lakah beiseina a neih san thu sawiin,"Ka naupan deuh lai khan Upton Park-ah Pardew hian min lo kaihruai tawh a, amah hi ka hrechiang a ni. A kaihruaina hnuaiah hma ka sawn zel theih ka beisei a, he hmuna ka lo kal thei hi ka lawm takzet a ni," tiin a sawi.

English defender hian kum bithliah inelnaah chuan England tan khel kual nual tawh mah se senior level-ah a la inlan lo a. 2012 London Olympic an thlen kha chuan Great Britain aiawhin a inlan ve thung.