England coach turin Sam a ṭha - Sir Alex

Manchester United manager hlui Sir Alex Ferguson chuan Roy Hodgson thlaka England enkawl tur chuan English manager zingah Sunderland boss Sam Allardyce aia ṭha an awma a hriat loh thu a sawi.

Sir Alex chuan, "Buaina ni ta ber chu England khan Euro 2016-ah an khelh ṭhat ngei ngei kan beisei a, beisei anga thil a thlen tak lohah chuan kan buai ta vek a ni," tiin England chuan a chhe lam thlira inruahmanna an nei lo niah a ngai.

United legend chuan sawi chhunzawmin, "England enkawl tura ṭha ber sawi a harsa a, English manager ngei an duh a nih chuan Premier League-ah pathum chiah an awm. Chung zingah chuan Sam hi manager tawnhriat ngah tak a ni a, England enkawl tur hian a ṭha tawk," a ti.

Manchester United a enkawl chhunga league nomawi 13 chawi thei manager chuan Football Association chu an football calendar ennawn leh tura rawn nghalin, "Germany-ah chuan December leh January-ah chawlh an nei a, Bundesliga-a khel player-te chuan hahdamna hun neiin tournament an hmachhawn thei. English player-te khan chawlh mumal pawh nei loin Euro an hmachhawn nghal a, hei pawh hi kan hre ve tur a ni," tiin Euro aṭanga England tlak hma chhan a sawi.