Argentina coach Martino a bang
Gerardo Martino chu Ar-gen-tina coach a nihna a ṭangin a bang a, Argentine Football Association (AFA) chuan Mar-tino banna hi an pawm nghal.
Kum 53-a upa Martino hian Alejandro Sabella thlakin 2014 khan Argentina hi a enkawl ṭan a, match 29 khelh puiin vawi 19 hnehna a chanpui a, vawi sarih chu an khingpuite nen inhnehtawkin a chak lo lamah ṭum thum an ṭang bawk.
Argentina hi Copa Ame-rica final-ah Chile hneh loin pahnihna an ni a, penalty pet goal lotu captain Lionel Messi chuan ram tana inkhelh a chawlhsan zui bawk.
An ram tana goal khung hnem ber Messi a chawlh takah chuan a teammate leh ṭhian ṭha ni bawk Sergio Aguero-a pa Leonel del Castillo chuan a fapain ram tana inkhelh a chawlhsan ve maitheih thu a lo sawi tawh nghe nghe. Player langsar ṭhenkhat pawh chawl tura sawi ni mah se Paraguay pawh lo enkawl tawhtu an coach ber a bang hmasa leh ta zawk a ni.
AFA chuan Barcelona coach hlui hian August thla a neih tur Rio Olympic-ah an ram team a kaihhruai tur thu chu hmanni khan an lo sawi tawh a, mah se player 18 thlan chhuah chungchangah buaina an tawh leh tak avangin coach hi a bang nia sawi a ni.
Thuchhuah siamin AFA chuan, "National team coaching staff chuan Olympic khel tur player thlan chungchang bakah harsatna dang an neih avangin an hna aṭangin an bang," tiin an sawi.
Kum 2014 khan hun rei tak chhung AFA president lo ni tawh Julio Grondona a thi a, hemi hnu hian hruaitu mumal an nei thei rih lo. Kum 2017 khian president thar an thlang dawn a, tunah hian FIFA thuhnuaiah an awm mek.
Hmabak a thim?
Khawvela player ṭha rual kawl khawmtu ni mah se Argentina hi kum 23 chhung zet inelna lianah an champion tawh lo. 2004 Athens leh 2008 Beijing Olympic-ah khan gold medal dawng tawh a, tun ṭumah erawh Rio-a kal lo thut thei dinhmunah an ding mek.
Argentine Olympic Com-mittee (COA) president Gerar-do Werthein chuan, "Tunah hian Olympic Games-a mipa football team kan tirh leh tirh loh chungchang chu 50:50 a ni. AFA nen hian thla 20 chhung zet inbiakna kan nei tawh lo," tiin an ram football hruaitute chak lohna a zep pui lo.
August 5-21 chhung hian Brazil khawpui Rio-ah ram 207 ten infiamna chi hrang 306 zet hmangin inelna an nei dawn. Football bik hi August 3 aṭanga khelh ṭan tur a ni.
World champion vawi hnih ni tawh Argentina hian Rio Olympic-ah hian group match-ah Portugal, Algeria leh Honduras te an hmachhawn dawn a, manager thar an ngaihtuah ran chu a ngai tawh. Hei mai hi a la ni lo, tun kartir kha chuan Argentina hian Olympic atana training hmachhawn tur player 11 an hmu tling lo.