Swansea-ah Leroy Fer a lut

Premier League club Swansea City chuan Queens Park Rangers
aṭangin midfielder Leroy Fer an lalut a, Welsh club tana loan-a lo khel tawh midfielder hian Liberty Stadium-ah kum thum cham tura contract ziakin a man zat hi pound maktaduai 4.75 a ni.

Kum 25-a upa mid-fielder hian January khan Championship club QPR aṭangin Swansea hi loan-in a zawm a, Francesco Guidolin-a team tan hian league match 11 inlan hmanin Premier League-a an inhamtan theih nan a thawhhlawk hle.

Hetihlai hian Watford goalkeeper Heurelho Gomes chuan Premier League club-ah hian hlawh sang zawk hlawh turin contract thar a ziak. Kum 35-a upa Brazilian keeper hian kum 2014 khan Tottenham aṭangin Watford hi free transfer-in a zawm a, 2015 khan kum thum dang cham turin contract thar a ziak. Spurs keeper hlui contract rei zawng hi a ngai ang rengin a kal ang a, a hlawh erawh a sang dawn tihna a ni.