Delhi Dynamos coach thar Zambrotta

Indian Super League (ISL) club Delhi Dynamos chuan season thar aṭanga an manager turin Juventus defender hlui Gianluca Zambrotta an lalut a, Thawhlehni khan Jawahar Lal Nehru Stadium-ah Delhi club hian an manager thar tlangzarhna hun hi an hmang a ni.

Kum 39-a upa manager hian player a nih laiin Juventus, Barcelona leh Milan tana khelin FIFA World Cup 2016-a Italy an champion khan an player pawimawh pawl a ni a, player ang chuan tawnhriat a ngah hle. Mahse, Italy tan vawi 98 a inlana goal hnih khungtu defender hian coaching lamah erawh tawnhriat a nei tlem hle a, Swiss second division club Chiasso bak a la enkawl lo.

Delhi Dynamos hian Indian Super League-a an season hmasa berah Dutch club Roda JC coach hlui Harm van Veldhoven hnuaiah an khel a, pangana nichungin season an khar. Brazilian legend Roberto Carlos chuan season hnihnaah Delhi club hi a enkawl ve leh a, semifinal lut chungin season an khar. Zambrotta hi season thum chhunga Delhi Dynamos coach pathumna a ni dawn tihna a ni.