Keeper ṭhain keeper ṭha a chher chhuak - Kopke

Germany goalkeeper Manuel Neuer hi tun dinhmuna khawvel goalkeeper ṭha ber ang hiala sawi a ni a, world champion hian Bayern Munich goalkeeper bakah Marc-Andre ter Stegen leh Bernd Leno te France ramah an hruai tel a, Paris Saint-Germain keeper Kevin Trapp leh Liverpool lak thar Loris Karius tan hmun a awm lo.

Die Mannschaft hi keeper neih ṭhat vangin an lar a, kum 1987
aṭanga sem ṭan IFFHS World's Best Goalkeeper chawimawina chu German keeper-in ṭum sarih zet an dawng tawh - Andreas Kopke (1996), Oliver Kahn (1999, 2001, 2002) leh Manuel Neuer (2013, 2014, 2015).

Tun ṭuma Germany keeper pathum Neuer, Ter Stegen leh Leno te enkawltu chu Kopke a ni. Kum 1996-a best goalkeeper dawngtu Kopke chuan, "Germany-in keeper ṭha an neih chhan chu keeper
ṭhain keeper ṭha a chher chhuah vang a ni. Tun hma aṭang tawhin keeper kan nei ṭha a - Toni Turek, Bert Trautmann, Hans Tilkowski, Sepp Maier leh Toni Schumacher te hming rilruah a lang nghal a. Tun hnuah Oliver Kahn leh Jens Lehmann te kan nei a, Manuel Neuer kan nei leh ta bawk," tiin an thiamna chu an inhlan chhoh zel thu a sawi.

Germany goalkeeper hlui Kopke chuan, "Goalkeeper ni tur chuan an inkhelh ṭantirh lamah outfield player anga an khelh tam a pawimawh. Goal veng tura intuai hriam hi chu an mamawh tho a, mah se khelmual chhung leh inkhelh dan hmang an hriatchian hi a ṭul em em a ni. An ke pahnihin ball an pet thiam a ṭul a, a bikin pressure hnuaia dik taka an pet thei a ngai a ni," tiin rawlthar keeper-te tana hriat tur pawimawh a sawi.