Mourinho-a'n England trio a awltir dawn

Manchester United manager thar Jose Mou-rinho chuan season thara atana an inpuahchahna tur inkhelah Euro 2016-a England tana inlan Chris Smalling, Marcus Rashford leh Wayne Rooney te a chhawr loh tur thu a sawi.

United hian July 16, tlai dar 6:00-ah Wigan Athletic nen friendly match an khel dawn a, hemi zawh hian tour an ṭan anga - Borussia Dortmund (July 22), Manchester City (July 25) leh Galatasaray (July 30) te an hmachhawn ang.

Jose Mourinho chuan, "Tour-ah chuan ka hruai ang a, mah se an khel dawn lo," tiin England trio chungchang a sawi. Portuguese manager hian vawiin hian training a ṭan dawn a, player an la kim lo nachungin a phur tawh thu a sawi tel bawk.

Wigan nen an inkhelh hunah kum 18-a upa Axel Tuanzebe leh kum 17-a upa full back Tyrell Warren te hman a tum thu United boss thar chuan a sawi. Mourinho chuan, "Player pahnih hi ka hrechiang lo. Amaherawhchu Nicky Butt, (head of football development) leh John Murtoug (Head of Elite Performance) ten an ring a, kei chuan thutlukna siamtute hi ka ring tawk, " tiin club kalphung a ngaih pawimawh thu a sawi.

Portuguese manager Mourinho chuan interview a hmachhawn hmasa berah player pali position khelh thiam bik nei an lakluh tur thu a sawi. United-in Zlatan Ibrahimovic, Henrikh Mkhitaryan leh Eric Bailly te an la lut chiang tawh a, palina tur nia an sawi chu an player hlui Paul Pogba a ni.

Manchester United leh Real Madrid te chuan France midfielder Pogba hi an inchuh niin sawi a ni a, sum thehchhuak huai zawka sawi Mourinho hote chu pawisa thapna lamah chuan Juventus midfielder lalut tura rinkai zawk an ni.