Zaninah Euro 2016 final tem lawkna Germany vs France
Euro 2016 thlengtu France-in semifinal thleng turin Iceland lakah goal nga an khung a, Germany-in tun hmaa inelna liana an la hneh ngai loh Italy hnehin a sang pali zingah an inhlangkai ve bawk.
Zanin dar 12:30 hi Marseille-a football ram ropui pahnih intawn hun chu a ni a, ziah hluai vanga ropui leh chuang tur a awm tawh lo - zanin ngei hi menrei zan chu a ni.
Phuba lakna hun
France chanchinbu L'Equipe chuan phek hmasa berah 'Phuba la turin kan tuihal' tihin an ziak kulh a, 2014 FIFA World Cup quarterfinal-a Germany an hneh lo ṭuma Antoine Griezmann ṭap Olivier Giroud-a'n a hnem lai thlak leh tun Euro khelh meka Atletico Madrid forward goal khung Arsenal forward-in a lawmpui lai chu an dah kawp bawk.
Kum hnih liam ta khan Rio de Janeiro-ah minute 13-na leka Mats Hummels-a goal hmangin Germany-in France hi an hneh a, 2016 World Cup semifinal lutin an champion zui bawk. Tun ṭuma hian season thara Bayern Munich zawm tur defender Hummels hi hrem vangin a khel dawn lo!
France hian Germany hi Euro-ah an la tum ngai lo a, FIFA World Cup-ah erawh an hneh hnuhnun ber chu kum 1958 daih tawh kha niin pathumna inchuhnaah France-in Just Fontaine-a hattrick hmangin West Germany 6-3 in an hneh. Nikum November thlaa friendly match-ah France-in Germany hi Olivier Giroud leh Andre-Pierre Gignac te goal hmangin Stade de France-ah 2-0 in an hneh a, kum 82-a upa Fontaine pawhin en mah se inkhelh hun lai hi firfiakten Paris khawpui an beih lai a nih avangin chhiatna hian inkhel chanchin hi a hliah khuh hneh hle.
Tun thlenga an la sawi tel reng erawh 1982 FIFA World Cup semifinal-a an intawn ṭum kha a ni a, Sevilla stadium Estadio Ramon Sanchez Pizjuan-a inkhelah hun pangngaiah 3-3 a inhnehtawk hnuin penaltyshootout-ah 5-4 in West Germany an chak. He inkhelah hian German keeper Harald Schumacher chuan French defender Patrick Battiston chu nikhaw hre loin a su thlu a, Bordeaux player hian a ha pahnih chanin, a nakruh pathum a khik bakah a hnungzângruhah a ti na bawk a, chutichung chuan referee-in foul a pe lo. Khelmual chhungah boruak a sang a, tun thlengin sawi zui a la hlawh.
1986 FIFA World Cup semifinal-ah ram pahnih hi an intawng leh nghal a, Andreas Brehme leh Rudi Voller te goal hmangin West Germany an chak. Inelna lianah Germany an chungnung zawk a, vawi 29 an intawn tawhna erawh France hi vawi 12 chakin record an nei ṭha zawk.
Club ṭhaa khelte
Zanin inkhel tur hi Europe club
ṭha Bayern Munich, Juventus, Arsenal leh Manchester United-a khelte an in ni nawk hlawm a, player-te hian club-a an khelhpuite laka tlawm an duh lo.
Tun Euro-a la tlan chak ber Kingsley Coman chuan, "Phone-ah Joshua Kimmich nen kan inbia a, ka khelh ṭhat ngei ka beisei. Germany-a ka let hunah sawi tur neih ve ngei ka duh," tiin dinhmun ṭha zawka din a duh thu a sawi.
Inhliam vanga tel ve thei lo France right back Mathieu Debuchy chuan, "Brazil-a Germany kan hneh loh kha France tan ka khelh hnua pawi ka tih ber a ni. Giroud leh Koscielny te nena Arsenal-a kan let khan Ozil leh Mertesacker te chu kan bulah an
ṭawng uang khawp mai," tiin a sawi ve bawk.
Engtin zel...
France manager Didier Deschamps-a'n a player ṭhat vanga duhthlan tura a buai tih loh chu inhliam leh hrem vangin harsatna a nei lo. Iceland an khelh ṭumin Sevilla defender Adil Rami leh Leicester City midfielder N'Golo Kante te an inlan thei lo a, anni aia lut Barcelona lak thar defender Samuel Umtiti leh Newcastle midfielder Moussa Sissoko te an khelṭha hle.
Thil chhinchhiah tlak tak awm bawk chu Deschamps-a'n inelna ṭantirha a hman 4-3-3 aiah 4-2-3-1 a hmang a, France-in goal nga lawih an khung. Kante thlak turin Crystal Palace midfielder Yohan Cabaye sawi rik awm mah se thahrui ngah zawk Sissoko a thlang kha a tisual lo.
Amaherawhchu Les Bleus hian goal hnih an chhuah a, Tottenham Hotspurs keeper Hugo Lloris thiam zia hmuh tur a awm bawk avangin tlarhnung a phui tawk loh tih zep rual a awm lo. Hei vang hian Sissoko aiin defensive game khel thiam zawk Kante a inlan hmel a, Umtiti aia kum riata upa Rami chu a tawnhriat vangin a luh hmel bawk.
Giroud an nei
Tlarhma lam erawh golden boot dawng thei tur table thlirin an ngaihtuah awm loh. France tlarhmaa awm Antoine Griezmann (4), Olivier Giroud (3) leh Dimitri Payet (3) te chu a chung lamah a indawt thla a, Arsenal striker Giroud hian France tana a inkhel bul a ṭan hnuhnung 11-ah goal 10 a khung a, Gunners-in Bayern an hmachhawn ṭumin Giroud hian Neuer-a lamah ṭum thum a khung tawh bawk.
Kar nga vel liam ta kha chuan Grioud hi Cameroon 3-2 a an hneh ṭuma a volley goal chung pawhin an thlak laiin France supporter-in an 'boo' hial a. Tunah chuan khami ṭuma deusawhtute khan Arsenal striker hi a khelh loh an hlau tawh a, Jamie Vardy dawrtu London club pawhin an club-a Giroud an nei chu an inchhuang tawh khawp ang. Chuti khawp chuan feet ruk leh inches thuma sang striker hian Euro a hmang ṭha a, Real Madrid striker Karim Benzema awm loh a lang lo.
Hummels-a awm lohna German tlarhnungin Giroud an ven uluk a ṭul dawn a, goal khung tam ber Griezmann an ngaihthah thei lo bawk. Striker pahnih thlawptu midfielder hi Payet bakah Manchester United-in manto taka an lakuh an tum Paul Pogba te an nih hlawm avangin Les Bleus hi an hmuhnawm ang.
Brazil sawptu
Germany-in 2016 FIFA World Cup-ah France an hneh zawhah inelna thlengtu Brazil an hmachhawn a, world champion ni zui ta Joachim Low hote hian football ram ropui bera an sawi Selecao chu an khaw tualah 7-1 in an sawp. Tun ṭumah hian Italy an hneh hnuah inelna thlengtu France an hmachhawn leh dawn a ni a, an tawnhriat hi a ṭangkai khawp ang.
Die Mannschaft hian goal khungtu Mario Gomez bakah midfielder Sami Khedira leh defender Hummels te an chan a, player pathum hi rinrawl vek an ni. Khedira thlak ṭhintu captain Schweinsteiger leh Hummels thlakna tur Benedikt Howedes te an dam chiang lo a, France hmaah Germany ṭha ber an inlan dawn lo.
Joachim Low hian 4-2-3-1 in Euro 2016 a ṭan a, Italy counter attack dang turin 3-5-2 in an khelh dan thlakin a hlawhtling. France an hmachhawn hunah hian 4-2-3-1 ah a thlak leh tawh rin a ni a, Gomez-a hmunruak luah tur hian Euro-a goal la khung ngai lo (783 Minutes) Thomas Muller chu rinkai a ni. Midfield lama Bayern forward hmunruak hi Mario Gotze-a'n a hnawhkhat thung ang.
Toni Kroos kawppui tur an la inrinsiak a, Liverpool midfielder Emre Can leh Borussia Dortmund midfielder Julian Weigl te bukin an awm mek. Reds midfielder Can hian season liam ta khan match 49-ah a inlan a, Weigl hian Dortmund tan match 51 a khel thung. Germany tana hming la chher chho tur midfielder pahnih hian veteran midfielder Bastian Schweinsteiger (31) leh Sami Khedira (25) te aiin an club tan an khel tam zawk ve ve.
Eng nge an sawi?
France boss Didier Deschamp chuan, "Inkhel pawimawh a nih avangin kan theihna zawng zawnga kan khelh a ṭul a ni. Germany hian Italy lakah harsatna an nei a, mah se Germany chu Germany an ni," tiin a khingpui tur a dah san rualin hneh ngei an tum thu a sawi.
France forward Giroud chuan, "Tlar-hnungah hote pawha kan tisual a nih chuan Germany chuan min hrem ngei ang. Germany hi world champion leh champion rinkai an ni a, 100% a inrintawk chu a harsa a ni. An theihna vanga hlau erawh kan ni lo - France chanchina bung thar kai kan duh avangin kan zauthau a ni," tiin inkhel tur chungchanga a sawi.
Germany coach Joachim Low chuan, "Player inhliam kan nghah bakah France hi a thlengtu an ni a, rinkai zawk an ni. Mah se hei hi minute 90 chhunga chakna tham a tling lo. Knockout match-a hetiang ram ṭha tum hi nuam ka ti. Italy kha chu an fing a, an dawhthei a, mah se an khelh dan tur a hriat lawk theih. France erawh an khelh dan an thlak thut thut avangin hriatthiam an harsa hle. Kan khingpui hi kan zah a, chutihrualin kan player inhliam tel lo pawh hian kan theihna kan hria," tiin a inrintawk thu a sawi.
THLIRNA TAWI
STARTING XI TURA RIN
Germany : Neuer, Kimmich, Boateng, Howedes, Hector, Weigl, Kroos, Draxler, Ozil, Gotze, Muller
France : Lloris, Sagna, Rami, Koscielny, Evra, Matuidi, Kante, Pogba, Griezmann, Giroud, Payet
HREM VANGA KHEL LO TUR
Germany : Mats Hummels
INHLIAM
Germany : Mario Gomez, Sami Khedira
DINHMUN CHIANG LO
Germany : Bastian Schweinsteiger, Benedikt Howedes
SEMIFINAL KALKAWNG
Germany : 2-0 Ukraine, 0-0 Poland, 1-0 Northern Ireland, 3-0 Slovakia, 1-1 Italy (6-5 pen)
France : 2-1 Romania, 2-0 Albania, 0-0 Switzerland, 2-1 Republic of Ireland, 5-2 Iceland
MATCH INFO
Stadium : Stade Vélodrome, Marseille
Mipui leng zat : 67000
Referee : Nicola Rizzoli (ITA)
Assistant referees : Elenito Di Liberatore (ITA)
Mauro Tonolini (ITA)
Additional assistant referee : Daniele Orsato (ITA) Antonio Damato (ITA)
Fourth official : Damir Skomina (SVN)
Germany France
Attacking
7 Goals 11
91 Total Attempts 87
40 Off Target 31
31 On Target 29
20 Blocked 27
3 Woodwork 6
35 Corners 34
8 Offsides 7
Defending
248 Ball Recovered 201
15 Tackles 17
12 Blocks 13
65 Clearances 86
Disciplinary
7 Yellow Cards 7
0 Red Cards 0
61 Fouls Committed 48
Head to Head
Germany France
43 Goals 43
27 Pld 27
9 Wins 12
6 Draws 6
12 Loss 9