MFA Super Cup Manager's Meet

Mizoram Football Associa-tion Super Cup 2016 chu July 14, 2016 satang hian khelh tan a ni dawn a, team an inbuatsaih nasa tawh hle. Team tel turte tana thil inhrilh hriatna hun Manager's Meet chu July 11 hian Lammuala neih tura rel a ni.

Nimin khan MFA Cup 2016 leh Independence Day Celebration Football Tournament 2016 Organising Committee chu Grand Hotel-ah an thukhawm a, thu pawimawh tak tak an rel. July 11 (Thawhtanni) tlai dar 2:00 hian Lammualah Manager's Meet neih tur a ni. He hunah hian MFA Super Cup khel tur team 66-a manager-te kal theuh tura hriattir an ni a; Aizawl pawna awm manager kal thei lo an awm a nih pawhin an aiawh an tir ngei tur a ni.

He hunah hian fixture kimchang tihchhuah a ni ang a, hei bakah hian tournament chhunga hman tur Player's Card sem nghal a ni ang. MFA Super Cup-a tel tur zawng zawngte chu he hunah hian an player list keng vek tura tih an ni a, Aizawl pawna awm club-te pawh Manager's Meet-ah hian an team list keng theuh tura tih an ni. District FA hnuaia awmin District FA hriatpuinain team list an siam tur a ni a, Zone FA hnuaia awmte pawhin Zone FA hriatpuinain list hi an siam tur a ni. Hengte hi Manager's Meet-ah hian ken khawm vek tur a ni e.

MFA Super Cup hi August 8 thleng thawh khatna khelh phawt a ni ang a, group pariata inthenin group champion theuhin Round of 16 an lut ang a, MPL team pariatte nen an inkhel leh ang a, Round of 16 hi August 17-a khelh tan tura ruahman a ni.

Tarlan tawh angin MFA Super Cup-a pakhatna hian champion nopui bakah Rs 1,50,000 an dawng dawn a, pahnihnain Rs 50,000 an dawng bawk ang a, inkhelh apiangin a chak zawkin Rs 1,000 zel an dawng ang. Inkhel en man lak a ni ang a, ticket hi Rs 30/- man a ni ang.