Olympic tan Russia a inpuahchah?

Nikum November thla khan World Anti-Doping Agency commission (WADA) chuan International Association of Athletics Federations (IAAF) hnenah Russia infiammiten damdawi hman phal loh an hmang nge hmang lo tih an zirchianna an theh lut.

WADA zirchianna aṭanga a lan danin 2012 London Olympic atan khan Russia hian an infiammite'n damdawi hman phal loh an hman leh hman loh an endik mumal loh bakah enchhinna an neihna hmun an an thi chhe lui niin an sawi.

He thil thleng avang hian IAAF president Lord Coe chuan, "Then thianghlim ngai a awm a nih chuan tih tur ṭul awm apiang chu kan ti nghal ang," tiin a lo sawi tawh. Hemi hnu hian Russia chu Rio Olympic-a tel thei lo tura hrem zui an ni a, London Olympic 800m gold medallist Mariya Savinova leh bronze medallist Ekaterina Poistogova te phei chu damchhung atana hrem an ni nghe nghe.

International Asso-ciation of Athletics Fe-derations (IAAF) rua-hman dan chuan Russian athlete zingah Olym-pic-a tel duh an awm a nih chuan "neutral athletes" angin an tel thei ang tih a ni.

Amaherawhchu, Rus-sian Olympic Com---mittee (ROC) an beidawng duh lo. Kar hmasa khan ROC hian infiamna hrang hranga thubuai ngaihtuahtu sang ber Court of Arbitration for Sport (CAS) hnuaiah an thubuai hi an khing let a - tunah hian Brazil-a kal turin athletics squad-ah mi 68 zet an ruahman mek.

ROC-in thubuai an khin-letna hi July 21 khian a chhanna an hmu hman tura beisei a ni a, hetih lai hian International Olympic Committee ruahman dan chuan July 11 hi chuan Rio Olympic-a inlan tur ram leh infiammite an chiang vek tawh tur a ni thung.