Wimbledon Roger Federer hmaah Cilic a tang zo lo

A ṭul hunah a 'cool' a, a dinhmun chiat lai pawha chiai loin dinhmun ṭha zawka a din pawhin a helhhawlh ngai lo; a umtu zawk dinhmuna awm chang nei mah se a khelh dan phung pangngai rengin a khel thei ṭhin - hei hi tennis player dangte aia Roger Federer danglamna chu a ni.

Nilaini zan khan Wimbledon 2016 mipa single quarterfinal khelh zawh a ni a, Federer, Milos Raonic, Tomas Berdych leh Andy Murray te chuan quarterfinal an paltlang - zanin hian semifinal khelh zui leh tur a ni ang.

World number 3 Federer-a'n a inkhelh thiamna hmun Centre Court-ah set hmasa pahnih a hloh hnuah Marin Cilic-a match point hmuh vawi thum ngawt a pawtthla thei a, darkar thum leh minute 17 chhungin 6-7 (4-7), 4-6, 6-3, 7-6 (11-9), 6-3 a hnehna changin a vawi 11 nan Wim-bledon semifinal a inhlangkai leh ta.

Match point vawi thum!

Wimbledon vawi sarih cham-pion tawh Federer-a'n 2014 US Open champion Cilic lakah nuamsa takin hnehna a chang bik lo. Swiss thiampuipa hian inkhel bul ṭhan fuh zawkin set khatnaah break point vawi hnih hmu mah se Cilic a talbuai nghal duh bik lo - beisei loh takin seeded pakuana hian set hmasa pahnih a la zawn zawk!

Kum 34-a upa Federer-a'n set thumna harsa vak loin la mai mah se set linaah erawh an inbei tawk tak zet a, Croatian star Cilic hian match point ṭum thum lai a hmu hial. Mahse, Federer-a'n a service
ṭhat hmang ṭangkaiin a inchhanhim thei hram zel a ni.

Set hnuhnung berah erawh tawn hriat ngah zawk a lang ta. Kum 2012 hnulama Grand Slam champion la ni leh lo Federer-a'n service hmasain a chesual tawh lo a, 5-3 a hma a hruai hnuah Cilic service chhuhsakin dinhmun ṭha takah a inhlangkai. A vawi khat nan match point hmu vein he inkhela vawi 27 nana ace siam zuiin hnehna a chang.

Beisei a awm em?

Grand Slam vawi 17 champion tawh Federer-a record hi tun din-hmunah chuan player dangte elphak rual ni lo mah se hnuhma ropui zawk hnutchhiah thei dinhmunah a ding mek.

A kum tam deuh tawh mah se a khelh dân hmang leh che vel a la fuh a, tharum hmang tam lo mah se a pawimawha hman turin a thahrui a khek thiam. Tun ṭumah hian seeded pakhatna leh champion lai ni bawk Novak Djokovic bakah seeded palina Stan Wawrinka te an tla tawh - Federer tan kawng a inhawng zaua ngaih a ni, chhawr
ṭangkai thei tak maw?

Service nei ṭha Cilic a hneh hnu-ah Federer chuan, "Ka khel chhe lo, a bik takin set hnuhnung pathumah khan sawisel tur a vang hle. Ka ke leh hnungzâng na in harsatna min siam sak lo a - ka service kha ka point hmuh theihna hnar ṭha berte zinga mi a ni bawk. Double fault ka nei miah lo a, kha kha thil thleng ngai zen zen lo a ni," tiin inkhel chungchang a sawi.

2014 hre reng rawh

Seeded parukna Raonic chuan world number 1 Novak Djokovic hnehtu Sam Querrey lakah 6-4, 7-5, 5-7, 6-4) a hnehna a chan zawh hnuin semifinal-a a hmachhawn tur Federer lakah hnehna chan chhunzawm theih a inbeisei thu a sawi chhuak zui nghal.

World number 41 Querrey-a'n a vawi khat nan Grand Slam quarterfinal a khel a, Raonic lakah hian a service na tak kha a chhawr ṭangkai leh thei tura ngaih a ni. Darkar hnih leh minute sawmthum pakhat an inkhelh chhungin Querrey hian ace vawi 15 siam leh thei mah se double fault vawi nga ngawt a neih bakah unforced errors ṭum 28 a nei a, semifinal lut turin a khelṭha tawk lo.

Kum 25-a upa Raonic hian 2014 Wimbledon semifinal a lo lut tawh a, Federer hneh loin a tla. Inkhelh hmabak thlir zuiin, "Hnehna chang tur chuan ka thisen leh taksa bakah ka rilru zawng zawng ka hman a
ṭul dawn a, result duhawm zawk ka neih theih tawh ngei ka beisei," tiin a chak lo zawka ṭan nawn a tum lo hle.

Khawtual tlangval

July 7, 2013 a ni a, Centre Court-ah mipui 15,000 pungkhawmin a pawnah mipui sang chuangin big screen aṭangin Wimbledin mipa single final an thlir - Britain ram chhunga mipui maktaduai chuangin TV aṭangin an en bawk. Andy Murray chuan world number 1 Novak Djokovic chu straight set a hnehin a champion.

British mipuiten kum 77 chhung zet an mahni ram ngei a khawltual tlangval single champion hmuh an lo tum tawh, nghakhlel taka an lo nghah ṭhin chu an nghak chhuak. An duhthusam then diktirtu Murray hi tun thlengin an la theihnghilh lo a 'ṭan rawn' a la ni reng.

Wimbledon 2016 quarterfinal hnuhnung ber inkhelah Britain number 1 Murray hian Jo-Wilfried Tsonga lakah set hnih la nghal mah se set hnih tho a hloh zui ve leh - darkar thum leh minute 53 zet an inhmachhawn hunah 7-6 (12-10), 6-1, 3-6, 4-6, 6-1 in hnena a chang. Semifinal-ah Tomas Berdych a hmachhawn zui leh ang.

Kum 29-a upa Murray chuan, "Tsonga hi grass court-ah chuan khawvela player ṭha berte zinga mi a ni. Ball a vuak nat bakah rawn dah letna tur hmun a hre thei a, min tlan tamtir hle," tiin a khingpui French tlangval a fak.

Seeded pahnihna Murray hi tun inelnaah hian a khel ṭha berte zinga mi a ni a, Federer nen hian last 16 thlenga set hloh loa kal tluang thei an ni. Anni pahnih hian quarterfinal-ah set hnih ve ve hloh mah se an tlang zui ta tho a, final-ah an inhmachhawn a nih pawhin a mak hran lo ang.

Berdych a tlo

Tomas Berdych leh Jiri Vesely ten Thawhṭan zan khan Court number 3-ah last 16 an khel a, set hnuhnung ber an khelh laiin êng (light) ṭhat loh vangin inkhel tih tawp a ni. Thawhleh zan khan chhunzawm niin Berdych hian 4-6, 6-3, 7-6(8), 6-7(9), 6-3 in hnehna a chang.

Nilaini zan khan Court One-ah seeded 10-na Berdych hian quarterfinal a khel zui leh a, darkar khat leh minute sawmnga panga chhung chauhin a sang pariat zinga seeded chang phak lo awmchhun Lucas Pouille chu 7-6 (7-4), 6-3, 6-2 in a hneh.

Kum 30-a upa Berdych chuan, "A zawna ni thum chhung inkhelh chu a awlsam lo a, Pouille lakah set thum chauha hnehna ka chan theih avang erawh chuan ka vannei hle. Tunah chuan final ka luh theih ngeina tura ka inkhelh dan tur ngaihtuah chiah ka hmabak rih," tiin semifinal-a Murray nen an inkhelh tur a pawimawh thu a sawi.