Mkhitaryan a chiang, tu nge 4-na?

Jose Mourinho-a'n Man-chester United a zawm phat a-ṭangin thawm a nei lian nghal. Season liam ta khan Red Devils tlarhnung a chak tawk lo a, Ivory Coast defender Eric Bailly lalut nghalin Sweden striker ropui Zlatan Ibrahimovic-a'n a pu hlui hnuaia khelh a thlang a, 'The Special One' hnuaia United player lakluh pathumna chu 2015-16 Bundesliga player of the season Henrikh Mkhitaryan a ni.

Portuguese manager Mou-rinho-a'n postion khelh thiamna bik nei 'specialist' pali lak a tum - player pathum a lalut tawh a, palina chiah an nghak ta.

Mkhitaryan a sen

Kum 27-a upa Henrikh Mkhi-taryan hian Borussia Dortmund aṭangin Manchester United hi a zawm a, Old Trafford-a khelh tur hian kum li chhung atan contract ziakin kum khat dang pawhsei theih dan a awm bawk. Season liam taa Bundesliga player of the season Mkhitaryan man zat hi official-in puanzar ni chiah lo mah se a man zat hi pound maktaduai 26 vel nia ngaih a ni.

United manager Mourinho chuan, "Henrikh hian a thiamna, a thlir thuina leh a khung theihna hmangin team tan a khel ṭhin. United a thlang hi ka lawm takzet a, a khelh dan hmang hi Premier League nen a inmil avangin harsatna a neih ka ring lo a, anni nena thawh ho hi kan châk tawh takzet a ni," tiin player thar a lo lawm.

Mkhitaryan chuan, "Ka duhthusam ṭhin kha tunah chuan a takin a thleng ta. Sulhnu ropui tak nei club-a ka inziak lut thei hi ka phur a, hun rei tak ka cham theih ka beisei. Ka chunga rinna nghattu club leh min ziak luttu Mourinho chungah ka lawm," tiin lawm thu a sawi ve bawk.

Tu nge Mkhitaryan?

Kum 27-a upa Mkhitaryan hi Armenia captain a ni a, Armenian zinga Premier League-a inlan hmasa ber tur a ni ang.

January 21, 1989 khan Ar--menia khawpui Yerevan-ah Mkhitaryan hi a piang a, a hunlaia striker ṭha Hamlet Mkhitaryan fapa a ni. An chhungkua hi football nen an inkungkaih ṭha a, a nu Marina Taschyan hi Armenian Football Federation hnuaia national team department-a hotu a ni a, a u hmeichhia Monica pawh UEFA headquarters-ah a thawk bawk.

Mkhitaryan hi kum sarih lek a nih laiin a pa Hamlet chu kum 33 leka upa niin 'brain tumor' vangin a thi. United player thar Henrikh chuan, "Club ropui taka ka inziah luh hian ka pa pawh a chawimawi ngei ang. Amah khan ka naupan laiin phurna leh thathona min pe a ni," tiin a pa a theihngilh loh thu a sawi.

Henrikh hian Armenian club FC Pyunik aṭanga inzirchhuakin an ram club-ah hian kum 2009 thleng a awm a, hemi zawh hian Ukrainian club Metalurh Donetsk-ah kum khat a awm leh bawk. Kum 2010-ah Armenian midfielder hian Shakhtar Donetsk a zawm a, Ukranian club ṭha tan hian season thum chhungin match 104 khelin goal 44 a khung.

Kum 2013 nipuiah tuna Liverpool manager Jurgen Klopp-a'n euro maktaduai 27.5-in (£23.5) Borussia Dortmund-ah a lalut a, season hmasa pahnihah match 87 khelin goal 17 chiah a khung a, beisei a pha lo. Thomas Tuchel hnuaiah Mkhitaryan-a'n harhtharna a chang a, season liam tak han match 51 khelin goal 23 a khung.

Mkhitaryan hi Dortmund-ah field sir ding leh veiah a tlan thei ve ve a, amah hi ke dinglam hmang thiam ni mah se harsatna nei loin vei lamin a pet thei bawk. Season liam ta khan league bikah goal 11 a khung a, heng goal hi a ke vei lamin vawi ruk a khung a, ding lamin vawi li khungin a luin goal khat a khung bawk.

Palina chu?

Manchester United player palina tur hi an inrinsiak mek. Midfield laia ding thei ni ngei tura ngaih a ni a, Paul Pogba chu an sawi nasat pawl a ni.

Juventus midfielder Pogba hi hmun ṭhenkata an tarlan dan chuan United-in pound maktaduai 103-in lei an tum niin an sawi a, hei hi thudik a nih chuan khawvel-a player manto berin Real Madrid tan ni loin Manchester United tan a khel tawh ang.

Tun dinhmuna player manto ber chu Gareth Bale a ni a, kum 2013 khan pound maktaduai 85 zetin Real Madrid-in Tottenham Hotspurs aṭangin an lalut. Chutihrualin hriat reng tura ṭha erawh player manto ber hi an thiam ber emaw an ṭha ber emaw tihna a ni lem lo!