Messi leh a pa thiam loh an chantir

Argentina tana inkhelh chawlhsan hlim Lionel Messi leh a pa Jorge Messi te chu chhiah awlru a puh an nihnaah Catalan court chuan thiam loh chantirin thla 21 chhung jail tang tur leh pawisa chawi turin thuthlukna a siam.

Barcelona star Messi hi jail tan bakah euro maktaduai 2 chawi tura tih a ni a, a pa hi kum 2007-2009 inkara chhiah awlruk thubuai avang hian euro maktaduai 1.5 chawi tura hrem tel a ni ve bawk.

Spain rama an dan leh hraiah chuan kum hnih tling lo jail tang tura hremte tan pawisa chawiin jail bang zut pumpelh theih a ni a, Messi hi jail-ah a awm lo ang. Kum 29-a upa Barca forward hian thiam loh an chan tirna hi Spanish supreme court-ah a khinglet dawn.

Messi hian kum 2000 khan kum 13 chauha upa ni chungin Barcelona academy a zawm a, he hmunah hian inzir chhuakin 2004 khan khum 17 upa nichungin Barca tana a match hmasa ber a khel - hemi hnu hian Messi-a'n hnunglam a hawi tawh lo a, hlawhtlinnain a zui zel a ni ber.

Barcelona tan hian match 531 a khelh aṭangin goal 453 tehmeuh a khung tawh a, Ballon d'Or chawimawina pawh vawi nga dawng tawhin an club chanchina player hlawhlting berte zinga mi a ni mek.

Barca tana La Liga goal khung hnem ber nihna chelhtu Messi hian kum khatah a club aṭang hian euro maktaduai 36 a hlawhtling a, a sum lakluh ringawt hi euro maktaduai 315 vel nia chhut niin Forbes magazine-in khawvela infiam-mi hausa a tarlan zingah 10-na din-hmun a chelh phak nghe nghe.

Thubuai chungchangah Messi hian a hriat thuk ve loh thu sawiin, "Kei chuan football ka khel a, thil dang ka hre tam lo. Ka contract chungchangah hian ka pa leh ka lawyer chungah rinna ka nghat a, kan thutlukna chu anmahni kuta engkim dah hi a ni," tiin hre reng chunga tisual a nih loh thu a sawi.

Thuthlukna dik lo?

Messi leh a pa thiam loh chantir an nih hnu lawkah Leo-a dan hremi chuan, "Thuthlukna dik lo a nih avangin rorelna sang zawka thlen a nih hunah kan ṭanna a dik zia kan hria ang, thiam chang leh thei turin hun ṭha kan la nei," tiin a sawi.

Catalan court-in chhiah awlrua a puh kum thum chhung hian Messi leh a pa hian chhiah an chawi tur euro maktaduai 5 chu an pe niin an sawi ve thung, thubuai hi a la tawp mai dawn lo niin a lang.

A naupan lai aṭanga inkhelh zirtu Barcelona lam chuan an player hi kawng engkima an
ṭan thu an tarlang a, Spanish tax office nena an buaina chungchangah hian Messi hi a thiam zawk ngei an ring tlat a ni.