Carlos Tevez-a'n sum a phut sang

West Ham United chuan an striker hlui Carlos Tevez chu kar khata £150,000 hlawh turin lakluh leh an tum a, Argentina inter-national hian hlawh sang zawk a phut avangin a club hlui sawmna hi a hnawl.

Manchester United leh Juventus tan pawha lo khel tawh Tevez hi Hammers hian kar khata £150,000 pek an huam bakah bonus ken tel tir an tum a, an stadium thar Olympic Stadium-ah hmun nghet chan tira first-choice striker ni turin sawmna duhawm tak an hlui.

Mahse, kum 32-a upa Tevez hian kar khata £250,000 tal hlawh a duh a, a beisei ang an pe thei a nih loh chuan Boca Juniors tana khelh chhunzawm zel a duh zawk.

West Ham neitu zinga mi David Sullivan chuan, "Tevez hi kar khata £150,000 bakah bonus dawng tura lakluh kan duh a, mahse hei aia tam hlawh a duh thung. A kum ngaihtuahin a ṭhat ber lai a pel tawh a, tun dinhmunah chuan sum tam zawk thehchhuak tura thuthlukna siam nghal mai theih a ni lo," tiin a sawi.

Argentina tana match 76 kawl tawh Tevez hian Man United-in Champions League nomawi an chawi theih nan khan Chelsea lakah penalty shoot-out aṭangin goal a khung ve nghe nghe. Hemi hnu hian Serie A-ah kalin Juve chu league-ah vawi hnih a champion pui leh bawk.