Schalke-ah Huntelaar-a'n cham a duh

Tun hnaiah Schalke-in Basel aṭanga striker thar Breel Embolo an lakluh avangin Klaas-Jan Huntelaar chu chhuak tur anga sawi ni mah se Dutch striker chuan German club-ah hian cham zel a duh thu a sawi.

Schalke hian Switzerland international Embolo an lakluh hnu lawkah Huntelaar-a lo khelh tawhna Ajax chuan an striker hlui hi laklet an tum ve lehnghal a, mah se kum 32-a upa striker hian Bundesliga lama khelh chhunzawm zel a thlang ta zawk a ni.

Season hman zawh taka inelna hrang hranga goal 16 khungtu Dutch striker chuan, "Eng thutluk-na mah tunah hian ka siam a ṭul lo. Schalke-ah hian contract la hman zawh loh ka nei a, he club chhuahsan hi ka ngaihtuah ngai lo," tiin chhuah a tum hmel loh hle.

Netherlands tan vawi 76 inlana goal 42 khung thei striker chuan sawi chhunzawmin, "Schalke-ah hian ka hlim a, he hmun hi nuam ka ti a ni. He club-ah hian hun rei tak chhung ka lo awm tawh a, Schalke-ah hian hlawhtlinna tam tak chhar ka duh a ni," a ti.

Real Madrid tan pawha lo khel tawh striker hian kum 2010 khan AC Milan aṭangin Schalke hi a zawm a, German club tan hian inelna hrang hrangah match 216 khel tawhin goal 121 a khung tawh.