Inter Milan-ah Banega a chiang

Argentina inter-na-tional midfielder Ever Banega chuan Sevilla aṭangin Inter Milan a zawm a, Serie A club tan hian kum thum daih contract a ziak.

Kum 28-a upa Banega hian La Liga club tan season hnih a khel hman a, Europa League-ah
ṭum hnih a champion pui. Sevilla hian French Ligue 1 champion Paris Saint-Germain lakah an manager Unai Emery an chân tawh a, an play-maker an chan leh tak avangin a hnawh khat tur lakluh ngei a ngai ang.

Kumin May thlaa Sevilla leh Barcelona ten Copa del Rey final an khelh ṭumin Banega hi hnawhchhuah a ni a, hei hi Spanish club tana a inlan hnuhnung ber a ni ta.

Ball a thiam bakah a fin em avanga manager tam takin lakluh an duh Banega hian Argentina tan match 47 a khelh
aṭangin goal li a khung tawh a, Copa America-ah pawh khan an ram aiawha inlanin final-ah Chile an hneh lo thung.

Thla hmasa khan Banega hian Spain-ah season hnih chhung hun duhawm tak a hman chu a zawh tawh thu leh Inter vice-president Javier Zanetti-a'n an hnehna kal tura a sawm thu a lo sawi tawh a, tunah chuan thu chu a taka chantir a ni ta.