Argentina Olympic squad an puang

Manager Gerardo Martino a bang a, harsatna hrang hrang vanga buai mek Argentina chuan Rio Olympic football khel tur player 18 awmna squad an puang chhuak.

Argentine Football Association-in Olympic a an ram kaihruai tura an tih Martino-a'n a hna a bansan takah chuan 1982-1990 inkara Argentina tana match 32 lo khel tawhtu Julio Olarticoechea-a'n an ram team hi a enkawl lailawk dawn.

Serie A champion Juventus chuan forward Paulo Dybala chu Olympic khel tura chhuah an tum loh thu an lo sawi tawh a, Inter Mi-lan pawhin an hmatawng Mauro Icardi pawh Rio lama kal tir loh an duh thu an lo sawi tawh bawk. An ram football-ah buaina a tam avangin tun kar tir kha chuan player 11 pawh an ko khawm hleithei lo!

Player 18 koh zingah West Ham forward Manuel Lanzini leh Atletico Madrid duo Luciano Vietto leh Angel Correa te chu hming langsar an ni a, anni pathum bakah hian Joaquin Correa (Sampdoria), Lucas Romero (Cruzeiro) leh Geronimo Rulli (Real Sociedad) te chu an ram pawna inkhel awmchhun an ni.