Ronaldo hoin final-ah Portugal Wales Euro 2016 zin kawng a tawp ta

Kum 1958 hnua an major tournament hmasa ber khel Wales chu an mumang ram aṭangin kaih harhin an awm ta - Nilaini zan khan Euro 2016 semifinal-ah Portugal chuan Wales hi 2-0 in an hneh a, final an lut.

Lyon khawpuia team pahnih an intawn hmaa player sawihlawh pahnih chu Gareth Bale leh Cristiano Ronaldo te an ni. Inkhel a zawh meuh chuan Bale aiin Ronaldo a langsar zawk a, Portugal captain hian goal hmahruai a khung bakah Nani pet goal chu a ke aṭanga chhuak a ni bawk.

Cristiano Ronaldo-a'n engtiklai pawha buaipui tham a nihzia a pholang a, minute 50-naah sang taka zuangin Portugal goal hmahruai a tauh lut. Minute thum hnuah Ronaldo bawk a lang a, Real Madrid forward goal shot hi Nani chuan Wales goal-ah a lo tlawh a, ball kal dan chhut sualtu Crystal Palace keeper Wayne Hennessy-a'n a chhuah chiang hle.

Wales-in hrem vanga an chhawr theih loh midfielder Aaron Ramsey an mamawh zia a lang chhuak a, Portugal-in hliam vanga inlan lo defender Pepe tel lo chung pawhin an tlarhnung an venghim tluan thei.

Hlawhtlinna nen Wales

Ram tam tak tan chuan Euro semifinal aṭanga tlak hi hlawhtlinnaa chhiar chi a ni lo mai thei - mah se, kum 58 hnua inelna lianthama a vawi khat nana inlan ve leh chauh Wales tan erawh an ram football chanchina hriatreng tawh tur a ni a, an thlen chin hi a ropui thlawt.

Wales hian semifinal lut turin group stage-ah England an hneh lo tih loh chu ropui takin an khel a, quarterfinal-a Belgium 3-1 a an hneh theite kha Wales fan-te thinlungah a cham reng tawh ang.

Britain huam chhung ram zinga Euro 2016-a thleng sang ber Wales tan tournament chhung zawngin Joe Allen, Aaron Ramsey, Hal Robson-Kanu leh Gareth Bale te chu an innghahna an ni a, fan-ten player-te auh phur an thiam dan leh an thawhhlawk zia hmuh hmaih theih a ni lo bawk.

Euro-ah semifinal an luh theih miau avangin Wales an inringtawk sawt ang a, inrintawkna nasa tak nen 2018 World Cup qualifying an khel ang - Wales hian qualifier-a an match hmasa ber chu September thla khian Cardiff khawpuiah Moldova nen an khel ang.

Bale aiah Ronaldo

Khawvela player manto ber chu Gareth Bale a ni a, a man zat chu pound maktaduai 85.1 a ni. Welsh winger hmaa player manto ber ṭhin chu pound maktaduai 80 man Ronaldo a ni. Player pahnih hian Spanish club lian Real Madrid tan an khelh dun ve ve bawk avangin Nilaini zana an inhmachhawn hmain khaikhin an hlawh nasa hle.

Wales tana lawmawm lo tak chu Bale aia Ronaldo a langsar ta zawk kha a ni ngei ang. Mahse, Tottenham forward hlui hian a khel chhe ta duai tihna a ni lo, khelmual chhungah thawkrimin a tlan tam tak zet a, cross hlauhawm tak a neih bakah goal shot hlauhawm tak a nei bawk.

First half minute 45 chhung Ronaldo reh mah se chawlhlawk hman a nih hnuah erawh player ropui bik danglamna kan hmu. Portugal goal hmahruai khung tura a hun hman dik dan, a zuan san dan leh a tharum hman thiam dante chu hmuh hmaih chi a ni lo.

Ronaldo ropuina tifamkim lotu nia an sawi ṭhin chu inelna lianthama an ram a la champion pui miah lo hi a ni - Ronaldo-a'n amah sawisel ṭhintute chhanglet turin match khat chak chiah a mamawh ta.

Wales an zuai

First half-ah khel ṭha zawk mah se second half-ah erawh Wales hi quarterfinal thlenga kan hmuh team hmuhnawm kha an ni lo em ni chu aw tih mai tur a ni. Minute thum chhung leka goal hnih an chhuah hnuah an tho leh tawh lo a, Portugal tlarhnung lamah aiin Wales tlarhnung lamah inkhel hmuh tur a tam zawk.

Bale a hnual lo

Gareth Bale chuan, "Khelmual pawn leh chhung lamah kan theihna zawng zawng pein nuamti takin kan khel a, kan hnathawh avang hian inchhuang tur kan ni. Hnehna kan chan zawh loh avangin rilru a na, player-te pawh an hnual. Mahse, player-te hian an hnathawh thlir let se, an ram tan hna ropui tak an thawk a ni tih an inhre tur a ni," tiin an thlen china lawm turin a player puite a fuih.

Wales manager Chris Coleman chuan, "Kan dressing room chu player hnual tak tak hlirin a khat a, a pawi a ni. Ka player-te hi an hnathawha inchhuang tura ka hrilh viau chung pawhin hrehawm an ti a, an hnual em em a ni. Mahse, he tawnhriat ropui tak hian tun aia ṭha zawk ni turin a buatsaih ang. Kan vanduai palh chuan a na dawn tih ka hria a, mah se hetiang em em hian a na ang tih chu ka lo ngaihtuah pha lo," tiin an chak zawh loh vangin amah ngei pawh a hnual thu a sawi.

Ronaldo a phur

Portugal goal hmahruai khungtu Ronaldo chuan, "Euro 2004-a final kan khelh kha chuan kum 18 lek ka ni a, kum 12 hnua he dinhmun kan thleng leh thei ta hi ka lawm hle. Portugal hian final luh kan phu a, player-ten an phu a, Portuguese mipui ten an phu a, min ṭawiawmtu fans ropui tak ten an phu bawk a ni. Inelna ṭan hma kha chuan rinkai zingah kan tel lo a, tunah chuan final khel turin kan awm ta," tiin an result-ah a lawm hle.

Portugal coach Fernando Santos chuan, "Portugal hi team ropui tak hmuhin ka hmu fo ṭhin a, a changin football mawi tak khelin a changin mawi lem lo khelh chang pawh a awm ṭhin. Pawimawh ber chu kan tih tur kan tih hi a ni a, ka duh ber chu hnehna chan a ni. Zanina kan game kha a mawi takzet a, inkhel entute pawhin hmuhnawm an ti ngawt ang," tiin an khelh dana a lawm thu a sawi.

Inkhel chhehvel

• Euro semi-final vawi thuma inlan thei awmchhun chu Cristiano Ronaldo a ni (2004, 2012, 2016).

• Ronaldo-a'n European Championship-ah match 20 khel tawhin Euro-a inlan ngun ber player a ni a, a hnuaiah vawi 17 inlan tawh Gianluigi Buffon leh Bastian Schweinsteiger te an awm.

• Euro-a goal khung hnem ber Michel Platini-a'n goal kua a khung a, Wales lama goal a khung leh tak avangin Ronaldo hian French legend record hi a nihrual.

• Portugal tan semifinal vawi sarih an luh tawhah tun hi an vawi hnih chakna chiah a ni a, ram pawn semifinal-a an vawi khat chakna a ni bawk.

• Portugal-in Euro 2016-ah a vawi khat nan 90 minute-ah chak hmel an hmu ve ta a, final an luh phah zui!

• Wales tan an match hnuhnung paruka goal an khung loh awmchhun a ni.

• Kum 2015 hnuah Wales-in Aaron Ramsey tel loin chak hmel an la hmu miah lo (D1 L3).