July 25 aṭangin I Day Football

Independence Day Celebration Football Tournament 2016 chu July 25 aṭangin khelh ṭan a ni dawn ta. MFA Executive Committee-in a lo rel tawh angin Mizoram Premier League club pariatte bakah state pawn aṭangin team pahnih sawm an ni.

All India Football Federation Under 19 team chuan an tel theih tur thu an tichiang tawh a, I League Under 19 champion lai hi Group A-ah I Day Football champion lai Aizawl FC bakah Chanmari FC, Chhinga Veng FC leh Chamari West FC te nen an awm.

Group B lamah nikuma pa­hnihna Bethlehem Vengthlang FC bakah Dinthar FC, Zo United FC, Ramhlun North FC leh state pawn team (invitee team) pakhat zawk an awm ang.

Inelna kalhmang

Champion lai Aizawl FC leh pahnihna BVT FC hi seeded an ni a, team ṭha pahnih hi group hran ve vea dah an nih hnuah a bak zawng hi pawh a ni. Group tina team pangate hi vawi khat ṭheuh an inkhel kual chhuak ang a, a tawpah a sang pahnihin semi final an khel ang.

Group match leh Independence Day-a final match khelh tur hi chhunah khelh a ni ang a, semi final match hnihte hi zana khelh tura duan a ni.

Group of Death

Mizo club zinga I League khel hmasa ber Aizawl FC hotu lamin season liam taa an hlawhtlinna an lawmnaah team enkawltute chu MPL-a champion thei tur player lalut turin an hrilh a, MPL-a a zawna vawi thum champion chu a bata an bat a nih thu an sawi chhuak hial!

Aizawl FC- hi player lak kawngah an che tlai a, captain David Lalrinmuana chu ISL club Mumbai City laka an chan bakah an elpui Chanmari FC-in midfielder R. Malsawmtluanga an chhuhsak bawk. Midfielder pahnih thlak nan hian Zo United aṭangin Lalnuntluanga an la let a, veteran midfielder Rohmingthanga ziak lut lehin rawlthar duhawm Lalawmpuia Hnamte chu an academy aṭangin senior team-ah hlangkai bawk mah se, heng player pathum hian midfielder pahnih chhuak tate hi an thlak zo kher ang em?

Hei chauh hi a ni lo - Mizoram Police aṭanga an hawh F. Lalrinpuia leh Lalbiakhlua te an club lamah an let leh tawh a, foreigner an la ziak lut lo. Joel Sunday, Alfred Kemah Jaryan, Yuta Kinowaki leh Emma Chigozie an chhuak tawh a, AFC-in I League team an phak lo ang.

Tlar hnungah Aizawl FC hi an phui ṭha a, winger-ah an ziaawm viau a, midfield leh forward lam hi beisei angin an ṭha tawk lo tih chu AFC ṭantute pawhin an pawm ang. Heti chung hian Aizawl FC hian I Day Football nomawi humhim thei tur player an la nei
ṭha tho a, chutihrualin foreigner tel lo chuan an awmna group-ah team ṭha dang an awm avangin tla nghal thei an ni bawk.

I Day Football 2013 champion Chanmari FC hian nomawi an duh ang bawkin an player lak dan thlirin Aizawl FC chunga awm an duh tih a lang a; Chhinga Veng FC-in player
ṭha lalutin season hmasa berah champion hrim hrim an duh. Chanmari West hi MPL an khelh hnua an sum hman tam ber ṭum a nih hmel a, an chhe lo. AIFF Academy tan semifinal thlen loh hi mualphona a ni bawk.

Group B lama invitee team a la hriat loh bawk avangin tun dinhmunah chuan group A-ah team
ṭha tura ngaih an awm tam zawk a, he group ngei hi 'Group of Death' chu an ni.

Group lehlam

Bethlehem Veng­thlang FC-in coach leh player ṭha ṭhenkhat chân mah se veng leh veng inelnaa tawn­hriat leh record nei ṭha Armed Veng coach Lal­biaksanga Colney hnuaiah trans­fer tawp lam an hmang ṭha hle. Veng chhung mipui ṭawi­awmna nei ṭha BVT dah hniam theih an ni lo ang.

Dinthar FC hi an vul loh lai ber pawhin an chuai ngai lo a, team 'tlo' tak an ni reng zel. Zo United FC-in tualchhung football kalhmang an hrethiam tawh - khelh an harsa sawt ang.

MPL5 Qualifier champion Ramhlun North erawh hriatthiam an har a, an player neih dan thlirin champion tura rinkai chu ni lo mah se coach Lalruatliana Sailo hnuaiah inrintawkna nen MPL club an nih hnua an tournament hmasa ber an khel ang.

'Invitee' turin MFA-in state pawn team ṭha an be mek a, group B pawh hi a hmuhnawm ang.

Group inṬhen dan

Group A : Aizawl FC, Chanmari FC, Chhinga Veng FC, Chamari West FC leh AIFF Under 19

Group B : Bethlehem Vengthlang FC, Dinthar FC, Zo United FC, Ramhlun North FC leh state pawn team (invitee team)

* A sang pahnihin semifinal an lut ang.

Fixtures

July 25, Thawhṭanni

12:30 PM Aizawl FC Vs Chanmari FC

02:30 PM Bethlehem VT FC Vs Dinthar FC

July 26, Thawhlehni

12:30 PM Chhinga Veng FC Vs Chanmari West FC

02:30 PM Zo United FC Vs Ramhlun North FC

July 29, Zirtawpni

12:30 PM Invitee team Vs Bethlehem VT FC

02:30 PM AIFF Under 19 Vs Aizawl FC

July 30, Inrinni

12:30 PM Dinthar FC Vs Zo United FC

02:30 PM Chanmari FC Vs Chhinga Veng FC

August 3, Nilaini

12:30 PM Chanmari West FC Vs AIFF Under 19

02:30 PM Ramhlun North FC Vs Invitee team

August 4, Ningani

12:30 PM Aizawl FC FC Vs Chhinga Veng FC

02:30 PM Bethlehem VT Vs Zo United FC

August 5, Zirtawpni

12:30 PM Chanmari FC Vs Chanmari West FC

02:30 PM Dinthar FC Vs Ramhlun North FC

August 6, Inrinni

12:30 PM Zo United FC Vs Invitee team

02:30 PM Chhinga Veng FC Vs AIFF Under 19

August 8, Thawhṭanni

12:30 PM Ramhlun North FC Vs Bethlehem VT FC

02:30 PM Chanmari West FC Vs Aizawl FC FC

August 9, Thawhlehni

12:30 PM Invitee Team Vs Dinthar FC

02:30 PM AIFF Under 19 Vs Chanmari FC