Wimbledon Serena hmaa ding tur Kerber

Kum 2002, 2003, 2008 leh 2009 Wimbledon final-ah khan Williams unau an lo inhmachhawn tawh. American star pahnihte hi Wimbledon 2016 hmeichhe single hmawr bawktuah an ṭang leh dawn emaw tih laiin Angelique Kerber a rawn lang - German nula hian Venus Williams hnehin Inrinni zan dar 6:30-ah Serena Williams nen final an khel ang. Inkhel hi Star Sports 1-ah live tur a ni.

Ningani zan khan Centre Court-ah hmeichhe semifinal khelh zawh a ni a, champion lai Serena chuan minute 48 chhung lekin Elena Vesnina chu 6-2, 6-0 in a sawp. Inkhel hnuhnung zawkah Kerber chuan Venus lakah darkar khat leh minute 13 chhungin 6-4, 6-4 in hnehna a chang ve bawk.

Serena a hrang!

World number 1 Serena hian tun inelnaah hian match ruk a khelh tawh aṭangin set khat chiah a la hloh! Third round, fourth round leh semifinal-ah te phei chuan set hnuhnung zawkah 6-0 vekin hnehna a chang thei a, a khingpuite tan hmunawl a siamsak miah lo a ni ber mai.

Kum 34-a upa Serena hian Russian nula lakah zahngaihna a lantir lo a, inkhel bul ṭan nan WTA ranking-a 50-na Vesnina service a chhuhsak nghal bakah hnehna chang turin ace vawi 11 siam zuiin double fault a nei miah lo. A vawi khat nana Grand Slam semifinal vawi khat kheltu Vesnina-i'n tawnhriat ngah Serena lakah tih theih a nei tam lo hle.

Inkhel chungchang sawiin Serena chuan, "Ruahsur vangin inkhel tam tak tih khawtlai bakah ṭhenkhat chu a hun sawn a ngai hial a, a ni zawna inkhel a ngaih fo avangin duhthusama khelh a harsa hle. Vawiin pawh khan point khat lek pawh sual chhuah hram hram zel a ngai," tiin awlsam taka hnehna a chan mai bik loh thu a sawi.

German tan Kerber

German nula zinga Wimble-don champion thei hnuhnung ber chu Steffi Graf niin kum 20 a liam tawh. Tunah Kerber-i'n hlawhtlin theihna hun ṭha a nei leh ta. Seeded palina Kerber hi vei khawr niin baseline aṭanga ball vaw thiam a nih avangin clay court-ah chuan player ṭha a nih zia kan hre tawh. Grass court-ah pawh a hlauhawm zia chu Venus hian a hrechiang ang.

Wimbledon vawi nga cham-pion tawh Venus-i'n a service a hloh nghal a, 2010 US Open hnua a vawi khat nan Grand Slam final lut leh turin a khelh ṭhat tawk loh bakah Kerber a chetsual duh miah loh avangin seeded pariatna Venus tan final luhna kawng a inhawng lo.

Kum 28-a upa Kerber chuan, "Tun dinhmunah Venus hi a khelṭha leh tawh hle a, a hriselna a ṭhat hnuah a kum tam deuh tawh mah se a thiam a la theihnghilh loh avangin hma-chhawn a harsa hle. Ka service ka hum tawk lo a, mah se ka ball vuak a dik avangin dinhmun ṭha zawkah ka ding," tiin a sawi.

Phuba

Grand Slam vawi 22 cham-pion tawh Steffi Graf hi Open Era-ah chuan hmeichhe single record nei ṭha ber a ni a, amah hnaih bertu chu vawi 21 champion tawh Serena Williams hi a ni. Tennis inelna hrim hrim thlir chuan Margaret Court (24) hi record nei ṭha ber a ni thung.

Kumin January thla khan Serena hian Steffi record nihrual theihna hun a nei a, mahse Australian Open final-ah a chak lo - a hneh loh chu German nula Kerber hi a ni. Tun ṭumah hian a vawi khat nana Wimbledon final khel tur Kerber hian a hnam pui nu record chhuanawm tak hi a humhim sak leh thei ang ngem tih chhannin a awm dawn.

Final thlirin Kerber chuan, "Kumtirah kan inhmachhawn tawh a, a chak lo zawka a
ṭan avangin tun ṭumah chuan chetsual nawn a duh lo ang. Min hneh theihna turin ruahmanna fel tak a neih pawh ka ring. Mahse, kei pawhin tunah chuan tawh hriat ka lo ngah ve leh deuh tawh a, inrintawkna ka nei. Hnehna chang tur chuan tunhma zawng aia ka khelh ṭhat a ṭul dawn. Kan inhmachhawn lehna tur hi Australia nen kha chuan a hmunhma leh boruak a inan loh em avangin eng nge lo theng dawn hriat a har," tiin a sawi.

Serena Williams hian nikum khan US Open nomawi a kawl lai a hloh a, kuminah Australian Open leh French Open final-ah a chak lo zawkah a ṭang bawk. Grand Slam pali zinga a la kawl lai awmchhun Wimbledon hi chu hloh a hreh tawh hle ang tih a chiang.

"Hlawhtling tur chuan in-khelh laiah chauh rilru pek a ngai" tia lo sawi tawhtu Serena chuan, "Kuminah chauh pawh major tournament pahnih final-ah a chak lo zawkah ka ṭang tawh a, tunah chuan hnehna chan ve tawh ka duh," tiin chak loh nawn a tum tawh lo.

A vawi kua nana Wimbledon final khet tur Serena chuan, "Kan intawn tawhna aṭangin Kerber hi a hlauhthawng ve ngai lo tih ka hre tawh, a bik takin inkhel boruak sang takah a tisual khat hle. A lak aṭangin zir tur ka nei a, ho lam taka point ka pe fo a nih chuan min hrem zui zel ang tih ka chiang," tiin a tawn hriat aṭangin fimkhur a ṭul zia a sawi bawk.

Player pahnihte hi tun hmain vawi sarih an lo inhma-chhawn tawh a, record nei ṭha zawk chu Serena niin vawi nga a chak zawkah a ṭang tawh a, final-a a hmachhawn tur hi a huphurh hran lo ang. Hetih lai hian Kerber hian ṭum hnih hnehna a chan ve tawh miau avangin khawvela player hlauhawm bera ngaih hi hneh turin inrintawkna a nei ve tho.

Open Era chu...

Tennis khawvelah kum 1968 hnulam hi 'Open Era' tih a sawi a ni. Open Era-ah chuan professional player leh eizawn nana hmang ve lem lo, mahni tuipui vanga tennis khelte chu Grand Slam tournament-ah an inel ve thei. Hemi hmalam hi chuan Grand Slam leh National Tennis League (NTL) buatsaih inelna bakah Davis Cup-ah te chuan mahni nuam tih vanga tennis khelte an inel ṭhin.

Tunlaiah chuan ATP (mipa) leh WTA (hmeichhia) ranking aṭangin Grand Slam khel tur seeding siam ṭhin a ni a, professional player ni lem lo tan chuan inelna tak hmachhawn turin qualifying match ruk vel zel paltlang a ngai a ni.