World champion pet tlatu France

Germany-in 2014 FIFA World Cup an champion hnuah European Championship final an thleng zo lo, Ningani zan khan Euro 2016-ah France hneh loin semifinal-ah an tla.

Stade Velodrome, Marseille-a inkhelah Les Bleus forward Antoine Griezmann-a'n first half tawp hma hretin penalty a khung a, Atletico Madrid forward hian second half-ah goal dang khung belhin Die Mannschaft chu 2-0 in an hneh.

Huai

Didier Deschamps-a'n Iceland an hma-chhawn hma zawngin 4-3-3 formation hmang-in Leicester City defensive mid-fiel-der N'Golo Kante chu tlarhnung ti khawng-tu pawimawh a ni. England hnehtu Iceland an hmachhawn ṭumin Kante leh defender Adil Rami te an hrem a, anni aia an luhtir chu Newcastle midfielder Moussa Sissoko leh Barcelona lak thar defender Samuel Umtiti a ni.

Deschamps-a'n Iceland lama goal nga khung thei player-te chungah rinna a nghat a, inelna ṭan hma leh ṭan hnu thlenga an formation hman thiam 4-3-3 aiah goal nga an khung theihna 4-2-3-1 formation bakah tawnhriat nei tlem Umtiti leh Sissoko chungah rinna a nghat ngam.

Huai lo

Joachim Low-a'n hrem vangin defender pawimawh Mats Hummels a chhawr thei lo a, inhliam vangin midfielder pawimawh Sami Khedira leh striker Mario Gomez te a hmang thei lo. Die Mannschaft boss-in inelna hmang ṭha Gomez thlak turin Thomas Muller a chhawp chhuak a, Khedira thlak turin captain Bastian Schweinsteiger dah mah se Toni Kroos nena inkawp tur chuan a ring zo lo.

Tlarhnung tichak turin Emre Can chu a vawi khatna atan a luhtir a, Kroos-a'n nuam a tih hmun chhuahsanin a tawlh hma a ṭul a, Liverpool midfielder Can luh vang hian World Cup champion ṭuma chakna goal khungtu Mario Goetze a awl phah bawk. Germany boss Low-a'n Italy an khelh
ṭumin attacking game a khel ngam lo a, France hmachhawn turin thutlukna huaisen zawk siam mah se goal khung aiin goal venhim a ngai pawimawh zawk.

Hand of Basti

France-in bul an ṭan ṭhaa a, Griezmann hmangin goal hlauhawm an nei nghal. Amaherawhchu Can-a khelh thut lu hai a reh hnuah Germany-in ball an chang tam a, Kante awm lohna France-in midfield-ah an ngam lo. Chutihrualin France keeper Hugo Lloris tibuai thei khawpin German tlarhma an hlauawm tawk lo a, France tlarhnung
ṭhiat thei lo nachungin vanneih ṭum chu nise Kroos-a'n Pogba lakah penalty a hlawh chhuak thei a, mah se Real Madrid beiseina hi Italian referee Nicola Rizzoli-a'n a ti hlawhtlin sak lo.

Deschamps-a hoten ball chang tam lo chungin goal hmaah erawh an hlauawm a, Arsenal striker Olivier Giroud-a'n Ger-man defender chhuanvawr Jerome Boateng su tlangin goal khung theih ngeina tur chance nei mah se a tlan chak tawk loh vang leh a thuhnuaia ball a dah theih loh avangin Benedikt Howedes-a'n a goal khung tur a dang hman.

First half tawp hma chiahin France-in corner an hmu a, Schweinsteiger-a'n Juventus defender Evra ball tauh tur dan nan a kut a thawh a, referee Rizzoli-a'n thutlukna dik siamin penalty a pe. Champions League final-a penalty pet goal lotu Griezmann-a'n khawvela keeper ṭha bera sawi Neuer-a'n bumin a pet goal, first half-ah 1-0 a ni.

Hei le, Griezmann

Goal hmahruai luh danin Germany a bara-khaih tih a lang a, second half-a bul ṭan ṭha zawk pawh France bawk an ni. Die Mannschaft-in an defender ṭha ber Boateng chu inhliam vangin an chân a, minute 61-naah Shkodran Mustafi a rawn inlan. Minute 11 hnuah France-in an goal hnihna an khung leh bawk.

German right back Joshua Kimmich dan sual vangin Pogba-a'n ball a chang a, France chhuanvawr hian harsatna nei loin Mustafi bum zuiin a cross ball chu Neuer-a'n hmun himah beng per zo lo. Griezmann-a'n a zawn taka ball tla chu tun inelnaa a goal rukna a khung. German player pathum Kimmich, Mustafi leh Neuer ten an hna an tlin lo!

Die Mannschaft-in goal hnih an chhuah hnuah an nawr na sawt a, Kimmich-a'n goal ban a pet per bakah substitute Leroy Sane leh Gotze ten an chance neih an hmang
ṭangkai lo ve ve a, defender pahnih Mustafi leh Howedes ten an lu hmangin goal an khung thei lo ve ve bawk. Bayer Munich midfielder Kimmich-a ball tauh ṭha viau mah se France keeper Lloris-a'n a ṭhatzia lantir nan a hmang a, Germany-in chance ṭhahnem tak an neih hian France-in goal hnih an neih tawh avangin inelna thlengtu tan hlauhthawnna tur a awm pha lo.

France forward Griezmann-a'n counter attack hmangin hattrick siam theihna hun ṭha a nei a, mah se Atletico striker ball pet chu Neuer tan harsatna a ni pha lo. Les Bleus-in final luh theihna tura an mamawh zat an khung a, 1958 FIFA World Cup hnua a vawi khat nan inelna lianah Germany an hneh.

Team ṭha zawk Germany?

Germany manager Joachim Low chuan, "Kum 2010 leh 2012-a kan chak loh kha chuan team ṭha lo zawk kan ni a, tun ṭumah erawh France aiin kan ṭha zawk. Ka player-te khan ti tura ka tih ang vekin an khel a, kan huaisen a, indem thei kan awm lo. Kan vanduaina chu goal kan chhuah kha a ni a, goal kan khung turin kan vannei tawk lo bawk," tiin team ṭha zawka a inngaih thu a sawi.

France manager Didier Deschamps chuan, "Kan khelhpui tawh zinga ṭha ber chu Germany an ni. Kan tihtur ṭheuh kan ti a, mamawh hun takah Lloris a rawn inlar bawk," tiin a a sawi.

Die Mannschaft hian inelna lian hnu-hnung parukah semifinal an lut a, heng zinga paliah (2006, 2010, 2012, 2016) hian an chak zo lo.

Inkhel Thlirna Tawi

Germany 0 - 2 France

FRA : Griezmann 45' (P), 72'

Tute nge inlan?

Germany : Neuer; Can (Gotze 67'), Boa­teng (Mustafi 61'), Ho­wedes, Hector; Kroos, Sch­weinsteiger (Sane 79'); Kimmich, Ozil, Draxler; Muller

Bench-a : Leno, Ter Stegen, Tah,

ṭhu tluan Schur­rle, Weigl, Podolski

France : Lloris, Sagna, Koscielny, Umtiti, Evra; Matuidi, Pog­ba, Sissoko, Griezmann (Cabaye 90'), Payet (Kante 71'), Giroud (Gignac 77')

Bench-a : Mandanda, Costil, Jallet,

ṭhu tluan Rami, Mangala, Digne, Sch­neiderlin, Coman, Martial